GIPAHIMANGNUAN ni LeBron James ang mga sumosunod sa Los Angeles Lakers nga dili magdahom og dako nga makaparang dayon sila og insakto batok sa National Basketball Association (NBA) champions Golden State Warriors.
Ang 33 anyos nga four-time MVP, kinsa mibiya sa Cleveland Cavaliers ug mitapon sa Lakers niadtong Hulyo, mipasabot nga taas-taas pa ang panahon nga ilang gikinahanglan aron mapagawas ang tanan nilang potensyal isip usa ka puwersa.
Giklaro ni James nga layo ra ang ilang sitwasyon kumpara sa Warriors tungod kay taodtaod na sab nga nag-uban ang kinauyokan sa ilang puwersa.
“We’ve got a long way to go to get to Golden State,” pasabot ni James.
“They can pick up right where they left off, starting with training camp. We’re picking up from scratch. So we have a long way to go.”
Matod ni James, dili sila angayang mabalaka sa Warriors ug kinahanglan lang nilang tutokan ang angayan nilang buhaton aron mapalig-on ang ilang kampanya.
Si Lakers exectuive Magic Johnson maoy nakadani kang James nga mobalhin sa Lakers.
Malaumon si Johnson nga ubos sa pagpangulo ni James, hayan mahibalik ang kasadya sa kampanya sa Lakers, nga sulod na sab sa ubay-ubay nga katuigan nga wala nakasulod sa playoffs ang Lakers. AFP, ESL