NAGKANAYON si Golden State Warriors coach Steve Kerr nga wala ra’y pressure nga gibati ang iyang mga magduduwa sa tinguha nilang ikaupat nga titulo sa 2018-19 season sa National Basketball Associaton (NBA) nga magsugod karong Oktubre 16.
Aduna man tuod posibilidad nga mabungkag ang lig-ong puwersa sa Warriors sa sunod tuig gumikan kay ubay-ubay sa ilang mga sakop ang mahimong free agents apan giklaro ni Kerr nga iya nang gipahimangnuan daan ang iyang mga batos nga dili maghunahuna niini.
Matod ni Kerr nga iyang gitambagan ang iyang ginsakupan nga maglingaw lang sa ilang kampanya sa umaabot nga season dala ang intensyon nga makadepensa pagbalik sa ilang titulo ug makaugbok og tipik sa kasaysayan.
Sa miaging upat ka seasons, ang Warriors nakalangkat og tulo ka mga titulo diin nahimo nilang karibal si LeBron James ug ang Cleveland Cavaliers.
“We’re playing with house money,” pasabot ni Kerr kabahin sa ilang paggukod sa kasaysayan.
“I think it’s pretty secure. I don’t think our guys should feel a ton of pressure. They should feel the importance of trying to do it again.”
Gipasabot ni Kerr nga kinahanglang magtutok sila ning maong season una maghunahuna sa umaabot.
“This might be the last time we have this current generation of Warriors, given all the free-agent situations in the future, so why not just go all out and enjoy every step of the way?” dugang ni Kerr.
Ang duha sa mga pambato sa Warriors nga sila si Kevin Durant ug Klay Thompson masulod na sa free agency sa sunod tuig.
Si DeMarcus Cousins, kinsa mibalhin sa Warriors niadto lang Hulyo, mahimo sab nga free agent sa sunod tuig.
“The idea is to really focus on how lucky we are to be here together in this era and this time and place,” pasabot ni Kerr.
“We’re well aware it’s not going to last forever. We have a lot to celebrate. Three titles in the last four years and a chance to add another one.”
Ang Warriors mosugod sa ilang kampanya sa sunod season pinaagi sa pag-host sa Oklahoma City Thunder karong Oktubre 16. AFP, ESL