“Gipasiatab karon sa administrasyon nga dunay gihikay nga destabilisasyon aron palagputon si Pangulong Rodrigo Duterte sa pwesto.”
ANG destabilisasyon gitawag nga “Red October” nga ilusad sa oposisyon uban sa Communist Party of the Philippines (CPP), National Democratic Front of the Philippines (NDFP) ug grupo ni Senator Antonio Trillanes IV.
Kini nga plano gibulgar sa intelligence sa Armed Forces of the Philippines (AFP). Apan, gilimod kini ni NDFP peace panel chairperson Fidel Agcaoili.
“There is no conspiracy between the CPP-NPA-NDFP and LP for the purposes claimed by Duterte and the military. Duterte and the military are scaring themselves to death,” suma niya.
Kini ang tubag ni Agcaoili sa pahayag ni Presidential spokesperson Harry Roque: “We have no doubts that the AFP has intelligence information on this. We have no doubts that the CPP-NPA [Communist Party of the Philippines-New People’s Army] has been out to overthrow the government since they were founded. We have no doubts that there are power-hungry individuals in the opposition.”
Nagtuo ko nga di makaasdang ang pundok nga nagtinguha nga palagputon ang Pangulo sanglit taas ang pagsalig sa kapulisan ug armadong kusog sa nasud sa ilang commander-in-chief busa ila gayud himuon kutob sa ilang mahimo ang pagpanalipod sa Pangulo.
Usa na dinhi ang gisugyot nga mugnaon nga anti-communist insurgency body nga maoy mogukod sa mga gikatahapang miyembro sa walhong pundok.
Ang giingon nga pagkunsabo sa oposisyon ug rebeldeng grupo usa ka paagi sa administrasyon nga mahadlok ang katawhan, ilabina kadtong mga kritiko.
Sa himuon nga task force sa administrasyon nga langkuban sa mga sibilyan, di kaha mosamot ang kasamok sa nasud? Di kaha mobanaw ang dugo sa mga Pilipino?
Kon buot ang administrasyon nga way moalsa nga Pilipino, mas nindot nga igahin ang tanang kusog sa pagpaningkamot nga maalibyohan ang kapobrehon sa nasud, mas paninduton pa ang polisya sa tanang aspeto sa panggobyerno.