GIDAKOP si Senador Antonio Trillanes IV mga alas 3 sa hapon Martes, Septyembre 25, sa National Capital Region police ug gihatud ngadto sa Makati City Police Station headquarters alang sa “booking procedure.”
Ang senador, sayo niini miingon nga di siya mosupak sa pag-aresto, gisugat sa Senate lobby sa mga midakop nga mga pulis nga gipangunahan ni National Capital Region Police Office (NCRPO) Chief Guillermo Eleazar.
Ang nahitabo ang pag-aresto pipila ka oras human ang Makati Regional Trial Court (RTC) Branch 150 miisyu og warrant alang sa pag-aresto kang Trillanes gumikan sa kasong rebelyon batok kaniya may kbahin sa napalpak nga Manila Peninsula Siege niadtong 2007.
Ang mga kaso gibuhi base sa Proclamation 572, nga giisyu ni Presidente Rodrigo Duterte niadtong Agosto 31. Ang proklamasyon nagpawalay bili sa amnestiya nga gihatag ngadto sa senador ni kanhi administrasyon ni Benigno Aquino III.
Si Trillanes, kinsa nagtago sa iyang buhatan sukad gipagawas ang proklamasyon ngadto sa publiko niadtong Septyembre 4, boluntaryo nga nanaug gikan sa ikalimang andana sa Senate office, uban ni Vice President Maria Leonor “Leni” Robredo ug mga senador Joel Villanueva, Paolo Benigno “Bam” Aquino ug Risa Hontiveros.
Samtang daling mipiyansa si Trillanes og P200,000 Martes.
Sumala sa senador sa dihang nahinabi nga ang pagpagawas og arrest warrant batok kaniya, nagpasabot sa pagkamatay sa demokrasya sa nasud.
“Natalo po ang demokrasya ngayong araw na ito...Officially ay wala na po tayong demokrasya,” dugang pa niya. (SunStar Philippines)