ANG kapulisan sa Cotabato City padayong nagsubay sa lima ka mga suspek nga giingong mi-gang rape sa duha ka menor de edad nga babaye, niadtong Lunes sa gabii, Septyembre 24.
Giingong pulos 16-anyos ang mga biktima, samtang ang mga suspek pulos mga higala ra sab sa duha.
Sa pasiunang imbestigasyon, nasayran nga gikan sa beach outing ang pito, apan dihang alas 8:30 na sa gabii, Lunes, nag-check-in ang grupo sa duha ka lawak sa usa ka lodge sa Cotabato City.
Gisaysay sa mga nakakita sa krimen nga pagnaug pa lamang sa sakyanan sa mga nahisgutan, makaduda na ang ilang mga lihok, ug nakita nga gialsa ang usa ka babaye.
Sa pagduda sa saksi, iyang gikompronta ang usa kanila, ug nagsulti nga mopahuway lamang sila sa lodging inn tungod hubog sila.
Pipila ka minutos ang milabay, dunay nahitabo nga komosyon ug abtik nga misibat ang mga lalaki sakay sa Strada nga sakyanan.
Wala pa sila'y kahadlok nga miagi sa checkpoint og miingon nga moadto sila sa istasyon sa pulis aron i-report nga dunay nahitabong komosyon.
Human sa hitabo, dali sab nga nahanaw ang duha ka mga lalaki, samtang ang tulo nga sakay sa Strada, misibat sab.
Dihang nasayran ang komosyon ug dunay mga bun-og ang mga biktima, dali sab silang gipangdala sa ospital aron magpatambal.