LUKATANAN sa police clearance gibalhin sa sulod sa kampo sa Cebu City Police Office human adunay gamayng problema sa building nga ilang giabangan sa White Gold Club habig sa reclamation area sugod niadtong Lunes.
Matod ni Sr. Supt. Royina Garma nga nakasugat og gamayng problema ang Records Section sa ilang building sa White Gold Club nga maoy hinungdan nga nakahukom siya nga ibalik nalang kini sa sulod sa kampo.
Kasamtangan sila nga gibutang sa buhatan kaniadto sa Cebu City Mobile Force Company apan temporaryo lamang kini sanglit magpatukod ang CCPO og laing opisina sa Records Section aron mahimong hamugaway ang molukat sa police clearance.
Matag adlaw kapin sa 200 ka mga tawo ang magpunsisok aron mokuhag police clearance ilabi na kadtong mangaplayay og trabaho.
Samtang, tan-awon karon ni Garma kon mahimo ba nga us-usan ang bayranan sa matag police clearance human nga dili na magbayad ang CCPO sa building ug sa kuryente niini.
“Tingnan natin kung pwedeng babaan natin yung presyo kase di na sila magbabayad sa kuryente pero titingnan muna natin kung pwede,” matod ni Garma sa mga tigbalita.
Sa pagkakaron, wa lang una hatagi og gibug-aton ni Garma ang unang memorandum of agreement tali sa Development Bank of Philippines nga hatagan silag high tech nga kahimanan alang sa pagkuhag police clearance nga sama na sa National Bureau of Investigation (NBI) clearance. AYB