GIPABUTHAN sa mga armadong lalake ang duha ka balay niadtong Dominggo sa Sityo Inayagan, Barangay Balungag, San Fernando, Cebu pasado alas 10 sa gabii sa Septiyembre 23, 2018.
Ang mga suspek naabot og kalit sa naasoy nga barangay ug nikalit lang og pabuto sa ilang gidala nga mga armas tumong sa panimalay ni Pedro Villaroso, kinsa kauban sa iyang ka live-in partner nga si Dorothea Manalop.
Matod pa ni PO3 Jose clare Palagpiosa, imbestigador sa San Fernando Police Station, nga sa wa pa nahitabo, ang mag live-in partner anaa sa sulod sa panimalay nanan-aw og salida sa TV nga naghigda. Wala hinuon mangaigo ang duha.
Dugang sa saysay nga nisyagit ang mga suspek sa ngalan ni Nicolas, nga daw sa maoy ilang gipangita.
Sa pikas balay kon diin nagpuyo si Nicolas Papasin, gipabuthan usab kini ka usa ka higayon ug gilabay og bato sa makaduha.
Nigawas ang mama ni Nicolas ug niatubang sa mga suspek ug nagkanayon nga wala si Nicolas sa sulod.
“Pasinsiya na” matod pa sa mga suspetsado, dayong biya sa maong lugar.
Nagkanayon si Palagpiosa nga nailhan sa mga biktima ang mga suspek nga sila si Antonio Merida, Marcelino Pantilgan ug aduna pay duha ka kuyog niini nga taga Barangay Tupas, silingang Barangay sa mga biktima.
Kasong attempted murder ang gipasaka batok sa mga suspek. Erwin Loregas, USJ-R Intern