HLURB mipahimatngon sa sellers ug developers

ARON malikayan nga masayang ang hinaguang kwarta, miawhag ang Housing Land Use and Regulatory Board (HLURB) dinhi sa Central Visayas sa mga buot mopalit ug condominium unit ug house and lot sa subdivision nga sigurohon nga adunay license to sell ang mga developers niini.

Kini nga pahimangno gipagawas sa ahensiya nunot usab sa kadaghan nga namaligya pinaagi sa social media site sama sa Facebook.

Sa gipahigayong Association of Government Information Officers - Philippine Information Agency (AGIO-PIA) Forum kagahapon, gipasabot ni Francis Ordeniza, ang regional officer sa HLURB 7, nga ang ilang ahensiya adunay records sa mga aprubado nga license to sell sa mga developers.

“Ug nagduha-duha mo og palit, mamahimo mo nga mo-verify pinaagi sa pagtawag sa among buhatan sa telephone number 254-4564 or mag-email sa cvr@hlurb.gov.ph,” matod ni Ordeniza.

Gidili sa HLURB ang pagpamaligya uo mga condo units ingon man ang mga house and lot sa mga subdivision kon ang developer wala makakuha ug license to sell.

Matod ni Atty. Joe Vinson Empaces, monitoring and adjudication head sa HLURB 7, nga pamultahon og P10,000 si ang developer nga namaligya nga way license to sell.

Base sa labing ulahing taho sa HLURB-7, ang Metro Cebu nakasinati og “maayo nga dagan sa real estate sector” karon tuiga.

Sud lang niining buwan sa Enero hangtod sa Septiyembre 21, naka-aprubar na ang HLURB ug 16 ka license to sell applications alang sa subdivision, 23 alang sa condominium ug upat sa memorial parks.

Ang project cost sa subdivision mokabat sa P3.5 billion, P3.4 billion sa condominium projects ug P35 million sa project cost sa memorial parks. HBL

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph