GITUGYAN sa Land Transportation Office (LTO) 7 ang 10,000 ka license plate numbers sa mga sakyanan nga narehistro niadtong Hulyo 2016 hangtod Pebrero 2017 ngadto sa car dealers sa Central Visayas aron maoy motiwas og hatag sa mga car owner.
Si Regional Director Victor Caindec nagkanayon nga nilagda sila og memorandum of agreement uban sa dealers diin ang mga plaka nga wala mahurot og distribute atol sa ilang usa ka semana nga massive distribution didto sa SM Seaside City, ang mga dealer maoy mohatag sa ilang mga kliyente hangtod Septiyembre 28.
Gumikan niini, giawhag ni Caindec ang mga car owner sa pag-adto sa ilang mga dealer kansang sakyanan narehistro sa maong mga buwan aron makuha na ang ilang lisensiyadong plaka.
Ang LTO-7 adunay 23,625 ka mga plaka para sa mga sakyanan nga narehistro Hulyo 2016 hangtod Pebrero 2017 apan 15,000 ra ang gikuha sa mga car owner atol sa usa ilang distribution didto sa SM Seaside niadtong ikaduhang semana sa ning buwana.
Gipadayg sa labaw sa LTO 7 nga kadtong mga plaka nga wala mahatag sa car dealer ngadto sa ilang mga kliyente, iuli kini ngadto sa LTO uban sa ilang report kon pila ka mga car owner ang nanakuha niini.
Dugang ni Caindec nga mohimo na usab sila og laing MOA sa higayon nga moabot ang bag-ong mga plaka gikan sa supplier sa LTO ug iapil na usab nila ang plaka nga wala mahatag nga giuli sa car dealer.
Subli niyang gipasidan-an ang mga car owner nga sugod karong Oktubre 1, ang mga operative gikan sa LTO, Highway Patrol Group ug mga deputized agent molusad og pagpanakop ngadto sa mga sakyanan nga narehistro sa maong mga buwan nga mibaliwala lang sa pagkuha sa ilang mga plaka ug pamultahon kinig P5,000. PAC