SA labing unang higayon, mapalit na unya sa supermarket ang National Food Authority (NFA) rice sa Sugbo human sa tie-up sa Department of Trade and Industry (DTI) ug Philippine Amalgamated Supermarkets Association (Pagasa) pinaagi sa usa ka memorandum of agreement.
Matod sa tigpamaba sa NFA nga si Olma Bayno nga pinaagi niini mahatagan og laing alternatibo ang konsumidor nga makapili sa palitan nila nga bugas.
“First time gud ni nga ma visible ang NFA rice diri sa mga supermarkets. Kasagaran mga commercial rice man na. This is to address the clamor sa public nga nagkataas gud ang presyo sa basic commodities including na ang rice.”
Dugang ni Bayno nga naghuwat pa sila og direktiba sa central office nila kon kanus-a sila makasugod og pagpamaligya sa supermarkets.
Niadto lang Septiyembre 23, niabot sa 440,000 ka rice inventory ang NFA sa Central Visayas.
“Amo gud nang gi-intensify ang amoang monitoring sad labi na ganahan mi nga kaning atong barato nga bugas maadto gud sa atong consumers. Ganahan gud ang NFA nga bahaon og rice ang market,” si Bayno nagkanayon.
Nanawagan na usab sila sa mga local government unit (LGU) nga tabangan sila sa pagmonitor sa presyo sa NFA rice sa ilang munisipyo.
“Amoang gi-encourage ug gi-tap ang LGU kay sila mismo mahimong motabang sa amoa and to be vigilant pud considering nga sa tanan ang responsibility.”
Sa Central Visayas, niabot na sa 300 ka accredited retail outlets ang NFA.
“Pag-resume og sales, naa gud mi mga employees nga regular nga naga-monitor sa nagbaligya og bugas.”
Anaa sa P27/kilo ang presyo sa NFA sa broken rice. HBL