MOKABAT sa P1.2 million nga hinabang ang ihatag sa mga Dakbayan sa Talisay ug Mandaue ngadto sa Dakbayan sa Naga.
Kagahapon sa buntag, ang Konseho sa Dakbayan sa Talisay niaprobar sa usa ka resolusyon alang sa paghatag og P1 milyon nga hinabang sa mga nabiktima sa landslide sa dakbayan sa Naga.
Si Konsehal Richard Francis Aznar, chairman sa committe on appropriation, nagkanayon nga ang pundo nga ilang gigahin alang sa abag sa dakbayan sa Naga gikan sa ilang quick response fund.
Sumala pa niya nga nakita nila ang panginahanglan sa mga biktima sa landslide.
Gawas sa P1 million, mohatag usab sila og mga relief goods.
Si Bise Mayor Allan Bucao nibutyag nga misanong sila sa lakang ni Mayor Eduardo Gullas ug Kongresista Samsam Gullas nga maggahin silag financial assistance sa mga nabiktima sa landslide sa Naga.
Gawas niini mipalabang sab silag resulosyon sa pagsimpatiya sa mga pamilya sa mga biktima.
Karong buntag, ilang ihatod ang P1 milyon nga tseke sa dakbayan sa Naga.
Ila kining personal nga itunol kang Mayor Kristine Vanessa Chiong.
Samtang, ang Kagamhanan sa Dakbayan sa Mandaue mohatag og P200,000 nga hinabang ngadto sa kagamhanan sa Dakbayan sa Naga.
Ang duha ka mga mobile kitchen sa dakbayan sa Mandaue napada na usab sa Naga.
Gawas sa gipada na nga mga sakop sa Mandaue City Disaster Risk Reduction and Management Team ngadto sa Tinaan, Naga aron pagtabang sa padayong gihimong search and rescue operation, sugod palang niadtong Huwebes, ang Kagamhanan sa Dakbayan sa Mandaue nagtinguha usab sa paghatag og tabang pinansyal.
Gitug-an ni Bise Mayor Carlo Fortuna nga karong hapon, atol sa ilang regular nga sesyon, ipalabang nila ang resolusyon alang sa paghatag sa Mandaue City government og P200,000 nga pinansyal nga hinabang alang sa mga nabiktima sa landslide. GPL & FMDD