SA gipahigayong panagtigom sa mga miyembro sa City Peace and Order Council (CPOC) kauban ang City Association of Drug Awareness Council (CADAC) niadtong Martes sa Mandaue City Session Hall, gipasigarbo sa kapulisan ang pag-ubos sa mga krimen sa dakbayan karong tuiga sa gipakitang crime rate index kasamtangan sa maong session.
Sa ilang natala, gipilo nag kaupat ang gidaghanon sa mga kasong murder karong tuiga itandi sa unang walo ka buwan sa 2017.
Sa natala sa crime rate index sa kapulisan, niubos gikan sa 17.15% sa unang walo ka buwan sa tuig 2018 ang mga krimen gikan sa 19.75% nga crime rate niadtong 2017.
Apan mato-d ni Mandaue City Police Office (MCPO) Director Julian Entoma, bisan sa pag-ubos sa krimen sa dakbayan, nagpabiling nisaka ang mga kasong carnapping ug murder.
Gani iyang giklaro, nga mga motorsiklo ang pasabot sa carnapping o motorcycle theft.
“Ubos ta pero ang amo lang gimean ang nisaka sa index crimes, niubos ta from 19.75% last year same period of first 8 months, naka 17.15% ra ta rong tuiga. Niubos og more than 2% ang pag-ubos sa atong index crime rate pero ang only nisaka ang carnapping nga motorcycle ug kining murder,” nagkanayon si Entoma.
Matod sa natala sa crime index rate, nisaka ang insidente sa kasong pagpatay o murder diin sa 6 ka kaso sa miaging tuig, apan 23 na kini karong tuiga.
Dugang niya niabot na usab sa 43 gikan sa 32 ang kasong pagpangawat sa motor o motorcycle theft.
Giasoy usab ni Entoma nga ang labing dakong rason sa pagkawala sa mga motorsiklo mao ang pagkawat niini samtang gibilin o gipark nga gitawag og “stolen while parking”, ilabi na sa mga suok nga lugar nga di makita sa mga CCTV.
Matod ni Mandaue City Vice Mayor Carlo Fortuna, usa sa sulosyon pagsulbad sa maong krimen ang pagkadena sa mga motorista sa ilang mga motorsiklo kon i-park kini.
“Ang amo lang awhag sa katawhan, gawas nga i-lock ninyo ang inyong motorcycles, mas better nga i kadena na sya para masiguro nga safe siya.” Fortuna.
Dugang pa ni Fortuna, iyang giawhag ang kapulisan sa pagbuhat og solusyon sa maong krimen.
“Atong giawhag ang kapulisan to take more action on how to prevent motorcycle theft.” Fortuna.
Plano karon sa kapulisan ang pagrealign sa ilang patrol area aron pagpalig-on sa pagmonitor ilabi na sa mga sudlunon nga bahin sa dakbayan matag gabie nga maoy kasagarang target sa mga kawatan.
Lakip sa pagubos sa crime rate ang pag ubos sa mga kasong Homicide nga aduna’y usa ka kaso gikan sa duha sa miaging tuig; physical Injury nga aduna’y 92 ka mga kaso gikan sa 107; rape nga aduna’y 25 ka mga kaso gikan sa 37; robbery nga aduna’y 70 ka mga kaso gikan sa 107; ug ang theft nga niubos ngadto sa 261 ka mga kaso gikan sa 290 sa miaging tuig.