GI-ANGKON sa anak nga gibuhat-buhatan lang niini ang amahan nga nilugos sa iyang manghod tungod buot niini nga bulagan ang iyang kaipon aron makatiwas sa pagtungha.
Nasayran nga gibilanggo si Nobleto (bansagon gitago), 39, minyo, usa ka Barangay Tanod, drayber sa sikad ug residente sa Barangay Lapasan ning siyudad sa Cagayan de Oro human kini gisumbong sa iyang 16 anyos nga anak nga iyang gilugos ang kamanghurang anak nga nag edad og 15 anyos kinsa adunay deperensiya sa panghunahuna.
Una na nga gipanghimakak sa amahan nga wala niini gihimo ang alegasiyon ug igo lamang nga gilambinglambing ang anak.
Sa pakighinabi sa SunStar Superbalita kang Nobleto gibutyag niini nga iya na nga gipasaylo ang iyang anak human kini nagpadala og sulat niadtong Septyembre 24 diin iyang giangkon iyang sala nga nabuhat ngadto sa iyang amahan.
“Pasayluon ra gihapon nako, gusto lang ko nga makahuman siya og eskwela,” tipik sa pahayag ni Nobleto.
Giingong nasuko ang iyang anak ngadto niya tungod sa tinguha niini nga mag focus una sa pagtuon ang iyang anak. Apan wala kini masabtan sa anak kinsa miangkon nga gugmaan kaayo kini sa iyang hinigugma hinungdan nga nahimo kini ngadto sa iyang amahan.
Nangayo na og pasaylo ang anak ug mibutyag nga buot niini nga mapagawas na sa bilanggoan ang amahan ug misaad nga magtarong una sa pagtungha.