GIKALIPAY ni Governor Yevgeny Vincente Emano nga adunay 50 ka mga barangay sa Misamis Oriental nga gideklarar sa Misamis Oriental Provincial Police Office nga drug free.
Malaumon kining nga unta mapadayon sa kapolisan ang pagmonitor ug pagmintinar niini.
Lakip sab sa iyang gilauman nga unta madugangan pa ang mga barangay nga madeklarar nga drug free dungan sa pagpaningkamot sa mga kapitanes labina niadtong bag-ong napili nga mga kapitan sa barangay nga ilang pakigbatokan ang ginadili nga druga sa ilang tagsa tagsa ka barangay.
“Nalipay ko nga naa nay na declared nga drug cleared barangay. I hope nga ma monitor ug ma maintain ang mga pagdeclare sa kapolisan. I hope that there will be more...especially sa mga bag-ong barangay captain karon nga napili ug mapadayon.”
Sa 424 ka mga barangay sa probinsya sa Misamis Oriental 50 niini ang gideklarar nga drug free kutob niadtong Septiyembre 29 ning tuiga ni Provincial Police Director Rolando Destura sukad gipakigbisogan sa lalawigan ang giyera kontra druga nga mando ni Presidente Rodrigo Duterte.
Sa maong 50 ka mga barangay ang mga lungsod nga adunay drug-free mao ang Alubijid, 5; Balingasag , 2; Claveria, 5; El Salvador City, 3; Gingoog City, 3; Kinoguitan, 11; Laguindingan, 2; Libertad, 2; Lugait, 2; Medina, 5; Salay, 5; Sugbongcogon, 3; ug Villanueva, 2.