‘Drug Queen’ gibuhian
NIADTONG adlawng Biyernes nakagawas sa prisuhan ang gitawag sa kapolisan nga ‘Drug Queen of the South”.
Sa 25 ka pahina nga desisyon gikan sa Regional Trial Court, Branch 41 nahukman nga 'acquitted' ug gimandong ipagawas sa prisohan si Johaira Macabuat Alyas Marimar ug Mayora.
Lakip usab ang iyang bana nga si Suharto nga nadakpan tungod sa ginadili nga druga ug paghupot og ilegal nga armas.
Ang mga ginadili nga druga ug armas nga nakuha sa mga dinakpan atol sa drug operation niadtong 2016 sa Kauswagan ning siyudad sa Cagayan de Oro ang nakitaan sa korte nga "fruits of a poisonous tree" tungod kay adunay mga kalapasan.
"Finding that the PDEA operatives had committed irregularities in the implementation of search warrants, this court cannot, in conscience, appreciate the presumption of regularity in the performance of duty in their favor," nakalatid sa order.
Lakip sa gibuhian sila si Sandato Sarip Alyas Sanny Santican ug Noraisa Sarip; Mark Gerald Sindac, Moamar Taher, Mariano Dagandara, Manot Duotan, Hezam Tambidan ug Kate Abinal.
Matud sa Regional State Prosecutor nga si Merlyn Uy nga gikasubo nila ang desisyon apan leksyon kini sa mga drug personel nga nagpahigayon og mga operasyon nga mosubay gyod unta sa balaod.
Matud ni Uy nga bisan og adunay balido nga search warrant nga naisyu batok sa mga akusado apan ang gibasihan sa acquittal mao ang iregular nga implementasyon sa search warrant.
Adunay lain-laing paagi sa pag isyu sa search warrant nga kinahanglan nga subayon.
Dugang niini nga walay kwestyon ang search warrant sa akusado lakip ang mga items nga pwede makuha tungod kay lakip kini sa napatik search warrant.
Apan adunay mga prosedyur sa pag-implementar niini nga kinahanglan sa pagpresentar sa search copies.
“Pagsulod nimo sa balay sa target we have to present the copy, kung wala ang subject any occupant sa house and they have to be present to avoid planting and irregularities, if walay family member ug wala you can still do the searching mao nga naay gakuhaon nga kapitan o kagawad to witness,” pasabot ni Uy.
Apan sa kaso ni Marimar atol sa trial sa korte nakitaan nga wala pay kagawad nga niabot ug wala gitugot ang mga akusado nga mag obserbar sa pagconduct sa search warrant hinungdan nga kadtong mga nakuhang mga drug items dili mahimong gamiton batok sa mga akusado.
Sa desisyon nasuta nga dili lang illegality sa implementasyon sa search warrant ang hinungdan apan ang pangangkon sa akusado nga ang nakuha nga mga illegal paraphernalia,planted.
Sa kasamtangan gitun-an na sa buhatan sa PDEA kon unsay sunod lakang nga ilang buhaton.