Webmasters 8-0 ang tuyo

Import. Ang presensya ni import Tochukwu Ewenike, kinsa naghansak sa hulagway, sa ilawom nga bahin maoy nakatabang og dako sa maayong gipakita sa USJ-R Jaguars sa CESAFI basketball college division sa kasamtangan. Sa premirong duwa karong hapon, ang Jaguars makigbatok og balik  sa USC Warriors. (SunStar File Photo)
Import. Ang presensya ni import Tochukwu Ewenike, kinsa naghansak sa hulagway, sa ilawom nga bahin maoy nakatabang og dako sa maayong gipakita sa USJ-R Jaguars sa CESAFI basketball college division sa kasamtangan. Sa premirong duwa karong hapon, ang Jaguars makigbatok og balik sa USC Warriors. (SunStar File Photo)

Mga duwa karon

5:00 pm- USC batok USJ-R (college)

6:30 pm- UC batok SWU (college)

PROTEKTAHAN sa league-leader University of Cebu (UC) Webmasters ang ilang limpyong rekord sa ilang pagpakigbatok og balik sa Southwestern University (SWU)-Phinma Cobras sa main game karong gabii sa Cebu Schools Athletic Foundation Inc. (CESAFI) basketball college division sa Cebu Coliseum.

Sa premirong duwa, magkombati ang University of San Jose Recoletos (USJ-R) Jaguars ug University of San Carlos (USC) Warriors.

Ang Webmasters ni coach Raul “Yayoy” Alcoseba mao ang labing init nga puwersa sa kasamtangan ug wala pa kini nakatilaw og kapildihan sa nag-una nilang pito ka mga duwa.

Sa ilang bahin, ang Cobras ni coach Mike Reyes kasamtangang nagsalimoang ug nagbitay kini sa ilawom nga dapit bitbit ang 2-6 nga rekord.

Nakaseguro na man tuod daan ang Webmasters og luna sa semi-finals apan importante gihapon kining duwaa alang kanila tungod sa usa ka ambisyon – deretsong pagsulod sa finals.

Ang makaposte og prepektong 12-0 nga rekord human sa double-round elimination makabaton og benipisyo nga makatukmod kanila’g deretso sa best-of-three championship series nga dili na moagi og semi-finals.

Ning sitwasyuna, ang No.3 ug No.4 teams mag-abot sa usa ka knockout game aron ilugan ang katungod sa pagpakigbatok sa twice-to-beat No.2 team sa semi-finals.

Lakip ning duwaa, ang Webmasters nagkinahanglan na lang og lima ka mga daog aron maselyo ang perpektong 12-0.

Kon buot hunahunaon, kulit na ang poruhan sa Cobras nga makaabante sa semi-finals gumikan kay kinahanglan nilang maharos pagdaog ang nahabiling nilang upat ka mga duwa sugod ning kombatiha.

Hinuon hangtod nga aduna pa sila’y gamayng poruhan, labing seguro dili mawad-an og paglaom ang Cobras ug mokombati kini hangtod sa ilang makaya.

Sama sa naandan, ang Webmasters magsalig og maayo nila ni Justine Dacalos, Darell Shane Menina, John Jabello, Paul Galinato, Joven Tagudin ug import Frederick Elombi.

Moparang sa mga nangahisgutan mao ang mga pambato sa Cobras nga sila si Shaquille Imperial, William Polican, Edmundo Bayhunan, Heider Bilao, Allyn Roncal ug Reeve Ugsang.

Sa laing duwa, ang Jaguars, nga adunay 5-2 nga rekord. makonsiderar nga inilog sa Warriors nga nagbitbit og 2-6 nga baraha.

Sa premiro nilang panagsangka, gipangmakmak sa Jaguars ni coach Leodie Garcia ang Warriors ni coach Bong Abad, 101-93, niadtong Septiyembre 18.

Kon modaog ang Jaguars ning sangkaa, hayan makaseguro na sila’g puwesto sa semi-finals bisan unsa pa’y mahitabo sa nahabiling nilang mga duwa.

Sa ilang bahin, ang Warriors hingpit nga mawad-an og poruhan nga makaabante sa sunod round kon mapilde sila ning duwaa.

Sa mga duwa niadtong Martes, gipakaging sa Cebu Institute of Technology University (CITU) Wildcats ang USC Warriors, 82-77, samtang gipukan sa Green Lancers ang USPF Panthers, 76-71. ESL

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph