ALAMADA, North Cotabato -- Lalaki nga niluog nga gipatay ug gihulog sa pangpang ang nakaplagan alas 4:00 sa hapon niadtong Martes, Septyembre 25.
Ang biktima, kinsa padayon nga giila samtang gisulat ning balita, gibanabanaan nga nagpangedaron og 35-40 anyos, dunay gitas-on nga 5'5”, mubo ang buhok, kasarangan ang panglawas ug daghang mga tattoo.
Sa taho gikan sa North Cotabato Police Provincial Office, nasayran nga nakamatikod ang pipila ka mga molupyo sa Sito Guo, Barangay Guiling, Alamada, nga naay mihunong nga kolor itom nga pick-up ug dunay gilabay ang mga sakay niini sa pangpang.
Daling mibiya ang sakyanan paingon sa Banisilan sa probinsiya nga molusot ngadto sa Wao, Lanao del Sur.
Gisusi dayon sa mga molupyo ang gilabay sa pangpang sa pagtuo nga naay mapuslan nga basura niini.
Apan dako ang ilang kakurat gumikan patay nga lalaki ang ilang nadiskubre ilawom sa pangpang.
Gihulagway nga ang biktima nakaangkon og mga samad sa nagkadaiyang bahin sa lawas, gigapos ang kamot ug tiil, gitaptapan ang mata sa packing tape, apil ang iyang baba.
Patay nga lawas gihatud sa mga nagresponde nga kapulisan ug mga sakop sa Citizen Armed Forces Geographical Unit (Cafgu) ngadto sa Alamada Funeral Homes.
Kapulisan sa Alamada Municipal Police Station nagpadayon sa gihimo nilang imbestigasyon. (Edgar E. Fuerzas)