NALUWAS ang usa ka abogado human nga gisulayan og ambush sa wala mailhing mga suspek nga nagsakay og motorsiklo Miyerkules sa dalang Candellaria, Ecoland, dakbayan sa Davao atubangan sa Regional Crime Laboratory Office (RCLO).
Si Police Senior Inspector Ma. Teresita Gaspan, Davao City Police Office (DCPO) spokesperson, nagbutyag nga ang insidente nahitabo alas 7:30 sa buntag Miyerkules, Septyembre 26, duol sa Hall of Justice.
Giila ni Gaspan ang biktima nga si Wilmer Quiñones Donasco, 44, molupyo sa Blk. 15 L3, Dafodel Street, La Vista Monte, Matina, Davao City.
Base sa inisyal nga imbestigasyon, mga alas 7:30 sa buntag samtang ang biktima moparada unta sa gimaneho niini nga Chevrolet pick-up sa lugar nga nahitaboan sa dihang kalit lang duha ka wala mailhing lalaki sakay og wala masayri nga motorsiklo milabay.
Ang angkas sa motor maoy mipabuto tumong sa lokasyon sa biktima sa makaduha ka higayon. Maayo na lang kay ang biktima wala maigo sa bala.
Apan si Donasco nakaangkon og gamay nga angol tungod sa pagpisik sa bildo sa sakyanan.
Matud ni Gaspan nga ang imbestigasyon nagpadayon aron nga madetermina ang motibo ug mailhan ang mga suspek.
Ang insidente nahitabo duha ka adlaw human usa ka abogado usab nga nailhan nga si Connie del Rio-Villamor, kinsa nagtrabaho isip community relations head alang sa Compostela Valley-based Apex Mining Corp. gipusil patay sa wala mailhing mamumuno.
Nagmaneho siya sa iyang sports utility vehicle (SUV) sa dihang duha ka mga mamumuno nagpusil kaniya duol sa Tagum City National Comprehensive High School sa Purok Gabayan 2, Visayan Village.
Si Police Senior Superintendent Allan Manibog, director sa Davao del Norte Police Provincial Office, nagsulti nga girekomenda na niya ang pagmugna og Special Investigation Task Group (SITG) aron nga mosusi sa insidente.
Dugang ni Manibog nga duna na silay inisyal nga impormasyon sa pagpatay kang Villamor. Gilantaw nila ang laing anggulo sama sa iyang propesyon o sa iyang mga negusyo.
Nangita sab sila og mga ebidensiya sama sa hulagway sa close circuit television sa mga establisemento duol sa lugar.
Samtang gikondena sa Integrated Bar of the Philippines Davao City Chapter ang pagsuway og patay kang Atty. Donasco.
“This incident is highly alarming as it happened only two days after Atty. Connie Villamor was murdered in broad daylight in Tagum City. The brazenness of the attack done in broad daylight near the Hall of Justice and police offices makes the incident even more alarming,” sa ilang pahayag.
“We, lawyers, have the duty to resolutely pursue the interests of our clients, within the bounds of the rules, and to the best of our abilities. We need an environment that is conducive for legal practice—an environment where we only worry about the results of the cases we handle for our clients, and not about our safety or security or that of our loved ones,” dugang sa IBP-Davao, diin ilang pahayag gipaagi kang IBP-Davao City chapter president Atty. Roger Largo.
Samtang ang Police Regional Office (PRO) nag-awhag niadtong dunay mga hulga sa ilang kinabuhi nga makig-alayon sa pulis alang sa igong aksiyon.