GITUBAG sa usa ka buotan nga police woman ang panawagan sa usa ka inahan nga matabangan ang iyang anak nga adlaw pa lamang gikan pag-anak anaa na na-admit sa tambalanan ug nagkinahanglan og maayo sa breast milk.
Nag trending sa social media ug napuno sa pagdayeg si Police Officer (PO) 1 Llena Sol Josefa Mainar-Jovita sakop sa Human Rights/PNRCO sa Women and Children’s Protection Desk (WCPD) sa Police Station 9 (PS9) sa Macasandig, dakbayan sa Cagayan de Oro.
Kini human ang usa ka inahan nga si Bhing Amatong, lumad nga taga Balingasag, Misamis Oriental, ang nag-post sa Facebook account niini og picture ni PO1 Mainar nga naghatod og 20 ka pack sa iyang breast milk aron makatabang sa anak niining nagkinahanglan kaayo og gatas dihang na-admit sa usa ka pribadong tambalanan tungod kay adunay balatian.
Sa interbyu sa SunStar SuperBalita ngadto sa 34 anyos nga si PO1 Mainar, gibutyag niini nga wala niya gidahom nga makahatag og atensyon sa kadaghanan ang sekreto niya nga paghatag sa iyang gatas sa usa ka bata nga nagkinahanglan.
“Nag-post man gud na iyang mama adtong August nga nagkinahanglan sila og breastmilk kay naadmit iyang anak una sa NMMC gibalhin sa Madonna.” Matud ni Mainar. Sa walay duha-duha kay labihan na ka abunda ang iyang gatas para sa iyang anak nga karon mag upat na bulan kanunay na lamang niyang ga i-pump ang gatas ug ipanulod sudlanan niini dayon ibutang sa refrigerator.
Nitakdo sab nga nagkinahanglan si Amatong hinungdan nga wala na siya’y daghan kaayo pangutana pa niini ug siya mismo nihatod og 20 ka packs nga adunay sulod 4oz ngadto 9oz matag pack sa tambalanan.
Mao kini ang mga hulagway nga nag viral sa social media.
Simple lamang nga polis si Mainar nga nadestino sa PS9, matud niya nga Oktubre tuig 2017 naminyo sa sundalo nga si Jomark Jovita.
Naburos, ug nagkaanak via caesarian section og usa ka healthy nga baby girl niadtong bulan sa Mayo.
Gisaysay niini nga struggle gihapon alang kaniya ang unang adlaw sa pagawas sa iyang anak tungod kay premirisa wala gayud mogawas nga gatas.
Pangandoy sab niya nga isip usa ka inahan mahatag ang insaktong nutrisyon ngadto sa anak nga sa gatas lamang sa inahan makuha hinungdan labihan gyod ang iyang pagpaningkamot nga makaprodyus og gatas ug sa kanunay iyang gaisige og latch ang anak.
Sa tabang ug dakong suporta sa iyang mapinanggaon nga bana adlaw-adlaw sab kini gapamalit og mga prutas ug gulay ug magsige og luto sa sabaw aron siya makaprodyus og daghan nga gatas para sa ilang bag-ong nahimugso nga anak.
Kini sa panahong silang duha nag maternity ug paternity leave.
Dinhi nagsugod nga miabunda ang agas sa iyang gatas ug hupong niini ang iyang anak.
Tungod kay sobra-sobra iyang gatigutom ug gaihatag ngadto sa nagkinahanglan.
Hangtod karon panahona sekretong gapadalhanan og gatas ngadto sa bata nga nagkinahanglan ug mapasalamaton nga discharged na sa kasamtangan.
Matud ni Mainar nga alang niadtong mga inahan nga bag-o pa nanganak apan walay motulo nga gatas nga dili mawad-an gyod sa paglaom. Tips niini.
Una, kanunay nga i-latch ang anak ug sige ipadede kay sa kadugayon nga pagsup-sop niini mogawas kini sa dili madugay.
“Wala ko nawad-an og paglaom. Pirme lang nato i-latch atong anak para naa gayud mogawas nga gatas.” Matud niini.
Ikaduha, dili sobra magpa-stress. Ang healthy nga palibot dako ug tabang sama sa mga supportive nga ginikanan, in-laws, mga kauban sa trabaho ug labaw sa tanan buhong ka sa gugma sa imong palibot daw dako kini kaayo og tabang.
Ikatulo, daw isip ginikanan taliwala adunay trabaho kinahanglan lamang ang insaktong time management.
“Dili babag ang imong trabaho aron mahatagan nimo og oras imong anak sa pagpasuso.” Matud ni Mainar ug midugang nga nahatag na ang wastong nutrisyon alang sa anak naka save pa og P1,000 kantidad sa usa ka semana gumikan sa kamahal sa formula karong panahona.
Madam Mainar sa imong sekreto nga pagkamatinabangon ug pagka wais nga misis makasulti ko og Super Kaayo ka!