Rabacal: Bayani na ba si Trillanes karon?

GIDAKOP sa mga sakop sa kapulisan sa National Capital Region (NCR) si Senador Antonio Trillanes IV subay sa warrant of arrest order ni Judge Elmo Alameda sa Makati Regional Trial Court (RTC) Branch 150 tungod sa kasong rebellion. Kining maong kaso nabasura na unta sa dihang gihatagan og amnesty si Trillanes ni kanhi Presidente Noynoy Aquino. Apan gibawi kini ni Presidente Duterte sa Proclamation 572. Tungod niini mihangyo ang Department of Justice (DOJ) sa Regional Trial Court Branches 148 ug 150 nga mo-isyu og arrest warrant ug hold departure order batok kang Trillanes. Misaad si Duterte nga dakpon lamang si Trillanes kon adunay warrant of arrest nga ipakanaug ang RTC. Mao na kini karon, gidakop na si Trillanes apan nakapiyansa kini. Bisan kon gawasnon na ang senador, daw gusto niya nga anha mopuyo sa Senado kay dili siya gustong mouli sa ilang balay kay anaa siyay gikahadlokan.

Diha kadtoy mga miingon nga kon dakpon sa Trillanes mahimo na hinuon siyang bayani. Hain na man ang mga dumadapig ni Trillanes? Wa man lagi kita makakita og mga protesta batok sa pagdakop sa senador? Angayang masayran nga si Trillanes adunay kasong coup d’etat nga giatubang sa RTC Branch 148 ni Judge Andres Soriano. Dili ba sundon sa maong maghuhukom ang desisyon ni Judge Alameda?

• • •

Kaniadto ang tuba-an maoy dapit diin magpundok ang mga tawo aron maghisgut o mag-debate sa mga mainit nga isyu. Karon anha na kini sa mga kapihan. Sa kapihan diin ako ug ubang mga higala magpundok matag buntag matawag nga venue of free expression. Naa si Liver, 56 anyos, ( nga dili buot nga ipa-ila ang iyang tinuod nga ngan) nga way laing buhat kon dili moreklamo ug manaway sa pangagamhanan ni Presidente Duterte. Pwerte siyang nakasaway kay wa kuno kini nahimo sa kanunay nga pagsaka sa presyo sa bugas, utanon ug isda. Dili siya uyon nga mopalit og isdang galunggong sa gawas sa nasud kay naa lagi kunoy daghang isda dinhi. Mobiya dayon siya human manaway.

Nagtuo sila si businessman Boy Sato, ex-mayor sa Dumanjug Tomas Garcia, former Cebu City mayor Alvin Garcia, Atty.-Gen. Fritz Quiñanola, “Fiscal” Pat Navarro, Vicente “Vesing” Sy ug Tatay Rudy- nga naapektuhan si Liver sa kamahal sa palaliton. Sayop sila kay iya man usab nga gisaway ang wa pagpa-presscon ni Duterte ug nagpa-interview lang og muro-muro kang Atty. Panelo. Supporter siya ni Maria Lourdes Sereno ug ni Senador Trillanes. Gisaway niya si Mocha kay wala kunoy hanaw gawas sa sayaw. Ang bugtong niyang gi-uyonan mao ang anti-drug campaign ni Duterte. Busa kining giingon ni Trillanes nga namatay na ang demokrasya sa Pilipinas dili tinuod. Aron siya masayud nga dakung buhi ang demokrasya maayong mobisita siya sa among kapihan aron magkita usab sila sa iyang lunod-paay nga magdadayeg nga si Liver.(mannyrabacal1144@gmail.com)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph