DUNA nay matulgan ang mga bisita nga gusto mag-overnight sa Hermit’s Cove sa Barangay Kantabagon, lungsod sa Aloguinsan.
Ang mga sakop sa Kantabagon Ecotourism Association, ang nagdumala sa Hermit’s Cove, naghimo og lima ka mga payag nga maoy sak-an ug katulgan sa mga bisita nga gusto mag-overnight sa nabantog nga suroyanan sa Aloguinsan.
Ang nakanindot niini gawas nga presko ang hangin, malantaw sa gawas sa payag ang nindot nga view sa dagat, ang silingang isla sa Negros ug ang kahilom sa palibot. Kon way dag-om, maaninaw ang Mt. Kanlaon.
May lima ka mga payag nga kapilian sa mga bisita nga ilang katulgan.
Ang pangan sa mga payag kay mga direksyon sa hangin.
Kini mao ang Dumagsa, Timog, Kanaway, Amihan ug Habagat.
Matod ni Maria Teresa “Riza” Alvarado, presidente sa asosasyon, kanunay maigo sa lainlaing klase sa hangin ang nahimutangan sa cliff houses.
Ang mga payag ginama sa nagkadaiyang klase sa kahoy sama sa mahogany, kawayan ug nipa nga makita ra usab sa palibot sa Aloguinsan.
Ang labing barato ug pangbarkadahan nga payag mao ang Dumagsa nga masudlan og lima ka tawo. Kini sa kantidad nga P2,800. Libre na ang pamahaw niini, tubig mainom, health kit ug kutson.
Managsama ang gidak-on ug bayranan sa Timog ug Kanaway sa tag P4,000 matag payag.
Apil sa package ang pamahaw, welcome lei, drinks ug mga prutas. Tudloan usab ka unsaon paghimo og kabkab, Bojo river cruise ug kaligo sa dagat.
Ang maong duha ka mga payag haom alang sa duha ka tawo matag usa.
Samtang ang Amihan ug Habagat kay susama ra usab og gidak-on ug inclusion sa package sa tag P4,575 matag payag.
Kini haom sa duha ka mga tawo.
Modugang ka og P800 alang sa matag tawo nga mapuno ug P300 kon magpadugang og kutson.
Pulos dunay electric fan ang matag payag. Presko hinuon ang hangin sa palibot.
Alang sa pamahaw nga idalit sa mga bisita, mag-agad kon unsay makuha sa mga mananagat sa ilang pagpanagat ug kon unsa ang makita sa palibot.
Gipasabot ni Chef Richard Hao, ang nagtudlo kabahin sa insaktong pagluto ug sanitasyon sa mga lokal nga nag-serve sa mga bisita, gituyo nila kini aron natural ang ingredients nga gamiton sa pagluto ug di na kinahanglan moadto og laing lugar ang mga residente aron dunay i-serve sa mga bisita.
Sigon ni Alvarado nga nagplano sila nga magdugang og mga payag. Apan dili usab sila magpalabi og padaghan aron di maguba ang kinaiyahan.
Siya nidugang ang Department of Environment and Natural Resources (DENR) 7 sa ilang gihimo nga mga payag, ang Amihan ug Habagat, diin ang ahensiya nihatag og P250,000 alang sa katukoran niini.
Kon igo lang maligo ug way plano mag-overnight, P100 ang entrance fee sa Hermit’s Cove.
Way bayranan alang sa mga bata nga siyete anyos ug paubos, P50 alang sa mga bata nagpangidaron og 7 hangtod 12 ug 20 porsyento alang sa mga senior citizen ug persons with disability (PWD).
Ang Kantabagon Ecotourism Association naporma niadtong Hulyo 16, 2011 nga karon adunay 34 ka aktibong mga miyembro.
Moabot sa singko kilometros ang gilay-on gikan sa sentro sa lungsod o Barangay Poblacion paingon sa Barangay Kantabagon.