MIBUL-OG ang kalamboan. Dis-og sa pantalan sa Pulangbato, Bogo; Hagnaya, San Remegio; Maya, Daanbantayan; Tabogon, Tabuelan ug Santa Fe. Irog sa Santa Airport. Rehabilitasyon sa nasodnong kadalanan sa Don Pedro Rodriguez, Dayhagon, Curva, Kawit, Tapilon, Maya, Ilihan, Caduawan, Binabag, Malingin ug Taytayan. Kongkretong provincial roads sa Panugnawan, Tinubdan, Lamintak, Luy-a, Poblacion, Daanlunsod, Mahawak ug Tabogon-Somosa-Bogo.
Taytayan sementado ug gipalapdan sa Logo, Tabuelan ug San Remegio. Sobra sa 10,000 ka kabataang kabos nabulahan sa scholarship program. Natukod ang CTU-Daanbantayan, CTU-San Remegio, CTU-Tabogon, CTU-Tabuelan, CTU-Bantayan, CNU-Medellin, Medellin Community College, Madridejos Community College, Philippine State of Aeronautics-Curva ug eskuylahan sa Tambongon, San Remegio. Padayon ang livelihood trainings. Gipasiugdahan ang fish cages, guso planting ug nag-apod-apod og mga kahimanan sa panagat. Gitukod ang Tesda Training Center sa Curva. Dagayday sa tubig sa tulo ka lungsod sa isla sa Bantayan. Liboan ang nakapahimolos sa Benhur Health Cards.
Gipundohan ang Bantayan District Hospital, Verallo Memorial Hospital ug Daanbantayan District Hospital alang sa mga masakiton nga walay bayad. Gihan-ay ni Rep. Benhur Salimbangon ang Master Plan paghimong tourist destination ug economic zone sa ika-upat nga distrito lakip na sa international airport nunot sa pagpalambo sa komunikasyon, tubig ug korente nga gikinahanglan sa mohugop nga magpapatigayon.
Aron paghingpit sa iyang mga damgo sanglit kataposan niyang termino maoy iyang padaganon ang kapikas nga si Janice sa 2019. Gani ning sayo pa mibalibad sa tanyag nga i-bise gobernador ni Rep. Gwen Garcia nga nagtinguha nga mobalik pagtimon sa probinsya.
Baruganan ni Rep. Salimbangon nga molambo lamang ang turismo kon anaay inprastraktura nga makaabag sa katuyoan. Misugyot nga i-reclassify ang Bantayan Island aron ang 14,183 ektarya nga protected area basi sa Presidential Proclamation 2151 sa 1981 mahimong alienable ug disposable nga luna kay daghang mga negosyante nga interesado nga mopalit aron ugmaron. Kini makadugang sa panudlanan ug daghang makatrabaho.
Uyon usab si Salimbangon sa pederalismo nga tukma, haom, angay ug panahon na para sa atong nasod karon nga bahigon og 18 ka mga estado nga anha ra ang buhis dili na mapunta sa Imperial Manila. Mahinungdanon alang sa interes sa maayong panggobyerno nga maghatod og lagsik nga kapalaran sa mga Pilipino. (csa_1156@yahoo.com/09064648954)