MAGPABILING pangulo sa Mabolo si Kapitan Niña Mabatid human gibasura sa Municipal Trial Court in Cities ang quo warranto nga gisang-at sa iyang kaatbang nga si Atty. Daniel Arguedo atol sa promulgation kagahapon.
Si Arguedo, gipildi ni Mabatid niadtong Mayo 2018 Barangay and SK elections, nagpatabang sa korte sanglit iyang gibarogan nga di residente sa ilang barangay si Mabatid sanglit ang iyang balay tua sa Barangay Talamban.
Apan si Judge Monalila Tecson sa branch 1 sa MTCC niingon nga kuwang sa merito o katakos ang iyang gisang-at nga petition uban sa pag-anular sa proklamasyon sa Commission on Elections.
Si Mabatid, kinsa anak ni Salud Ompoc-Mabatid, gipakatawo sa Barangay Mabolo kinsang balay nahimutang daplin sa Mahiga Creek ug nagtubo sa kakabos.
Gipadayag sa barangay chairman sa Mabolo nga mismo si Arguedo ang nagpadagan kaniya aron mahimong SK councilor dihang nag-edad pa siya og 15 anyos.
Ang presiding judge sa MTCC Branch 1 nikutlo sa ruling sa Supreme Court en banc Mitra v. Comelec niadtong July 2, 2010 nga nag-ingon “ The purpose of residency requirement is best met by individuals who have either had actual residence in the area for a given period or who have been domiciled in the same area either by origin or by choice” nga nihaom kang Mabatid.
Si Mabatid nanawagan og kahiusahan ngadto kang Arguedo ug oposisyon. PAC