LALAKI nga nag-amuk kay gibyaan sa iyang kapuyo, patay human napusilan sa usa ka pulis sa Mandaue City Police Office kay giingong suway untang nanunggab sa usa sa mga sakop sa Special Weapons and Tactics (SWAT).
Ang maong lalake giila nga si Roberto Ople, 57, usa ka construction worker sa may North Reclamation Area, kinsa patay na nga nadangat sa tambalanan human nakaangkon og usa ka samad pinusilan sa likod sa iyang lawas.
Matod ni Police Chief Insp. Mercy Villaro, tigpamaba sa MCPO, nga nakadawat og tawag ang Jagobiao Police station kalabot sa insedente sa pagpanunggab sa Zone Sibuyas, Barangay Paknaan, syudad sa Mandaue, pasado alas 11 sa Huwebes sa gabii.
Kini human gidunggab ni Ople ang anak sa tag-iya sa balay nga iyang giabangan nga si Niño Angelo Jayag, 24.
Sa inisyal nga imbestigasyon sa kapulisan, giingong nasuko si Ople nga gibuyag sa biktima sa kanunay nga pagbaid sa iyang sundang gawas sa balay sud na sa usa ka semana, human gibuwagan ug gibiyaan sa iyang kapuyo.
Matod ni Villaro nga gihulagway kini sa mga silingan nga daw sa nalisuan na sa hustong pangisip kay wa na mokaon ug kanunay manlaba sa ngitngit nga dapit o di ba kaha magbaid sa iyang sundang, kutsilyo, ug taas nga ice pick sa gawas sa balay. Halos kada gabii usab kini nga hubog.
“Nangabang ra man gud ni silang duha sa iyang live-in diha sa zone Sibuyas, unya mga one week na nga nibiya ang babaye, didto na nagsugod nga magsige nalang ni siya og baid sa iyang mga sundang. Masuko kon badlungon, mura na daw ni nalisuan ba,” gitug-an ni Villaro.
Giingong kanunay kini nga badlungon sa mga silingan ug sa barangay tanod kon magbaid sa iyang mga mahait nga hinagiban diha daplin sa dan tungod usab sa kahadlok sa mga tawo nga posibleng idunggab ngadto kanila.
Niadtong Huwebes sa gabii, sa dihang wa na kaagwanta si Jayag, iyang gihangyo si Ople nga undangon na ang pagbaid, apan inay nga mohunong, nasuko kini ug dayon dunggab kang Jayag, kinsa naigo sa walang bukton.
Daling nitawag og pakitabang a kapulisan ang mga lumolupyo sa dapit sa dihang niabot ang mga sakop sa Jagobiao Police Station, giingong nag-amok kini, bisan pa man gihangyo nga ipabutang ang dalang taas nga ice pick ug patahanon.
Niabot usab ang mga sakop sa Swat sa dihang sikupon na unta, nisuway kini sa pagdunggab sa usa sa mga sakop sa Swat ang laing kauban niini nga nakakita sa panghitabo ang daling nakapusil kang Ople, makausa ka higayon.
Dali unta kining gitabang ug gidala sa Mandaue City District Hospital, apan gideklarar nga dead on arrival.
Gidala usab sa MCDH si Jayag, ug gibalhin sa Vicenter Sotto Memorial Medical Center (VSMMC). Nakuha sa kapulisan ang mga sundang, kutsilyo ug ice pick nga iya sa suspek.
Ang kapulisan nanawagan karon kon si kinsa ang nakaila kang Ople, kay hangtod kagahapon sa hapon, way ni-claim nga tagtungod niini. Ang lawas ni Ople ang anaa pa sa morgue sa MCH, matod ni Sr. Inspector Rodgene Fudotan, hepe sa Jagobiao Police station.