BAYOT nasikop ug nakuhaag 22 ka ampoule sa Nubain ug usa ka medium size nga pakete sa shabu nga iyang gipasok sa lubot mao nga napriso sa Guadalupe police station nga padung na unta nga mopalusot sa illegal nga drugas sulod sa Cebu City Jail niadtong miaging hapon.
Ang suspek giila nga si Gilbert Castro Zabate, alyas Beta, 36, taga E. Chavez street, Barangay Lorega San Miguel, syudad sa Sugbo.
Matod ni Sr. Inspector Eduard Sanchez, hepe sa Guadalupe police station, nga ila nang gipanid-an si Zabate human gi-text sa Itug-an Mo ni CD ang illegal nga kalihukan niini.
Klaro ang impormasyon sa text message nga adunay usa ka bayot nga mopalusot sa Nubain ug shabu sa City Jail ug mihulagway kini kon unsay hitsura sa bayot.
Tungod sa maong kasayuran, nagpaatang si Sanchez og police sa gawas sa gate sa City Jail aron panid-an ang giingong bayot.
Tuod man pagka alas 3 niadtong Huwebes sa hapon, ilang nakita ang suspek, apan nakabantay kini nga siya ang tuyo sa mga pulis.
Aduna kini gikuot sa iyang bulsa ug dayong labay sa yuta, apan nakita sa mga pulis ang napulo ka ampoule sa Nubain nga gilabay hinungdan nga siya gidakop.
Pag abot sa police station niangkon na kini nga gawas sa mga pinakete sa shabu nga nakuha gikan kaniya aduna pa siyay gipasok sa iyang lubot.
Sa pagkuha pa sa bayot, didto ang lain pang 22 ka ampoules sa Nubain nga gisulod sa plastic apil na ang gituohang shabu.
Mobalor ngadto sa P196,000 ang usa ka medium pack sa gituohang shabu nga nakuha gikan kaniya.
Sa imbestigasyon, gitug-an niya ang tanan sa mga pulis sa Guadalupe kay adtuon ang igsuon niini nga nabilango nga si John Enest Zabate.
Apan ang kauban sa iyang igsuon nga usa ka bayot nga ginganlan niyag Danny Briones maoy mosugo niya pagpalusot sa drugas bugti sa suhol.
“Dili ang iyang igsuon ang iyang duawon, katong usa ka bayot nga napriso nga iyang amiga mao na iyang contact sa city jail nga si Danny Briones nga taga Lorega pud, mao daw ni mosugat niya sa sulod nga maoy mokuha sa drugs,” matod ni Sanchez.
Gitug-an usab niya asa siya mo kuha sa supply nga maoy hinungdan nga mihimo silag follow up operation uban si Zabate aron tultolan asa ang balay niini nga miresulta sa pagka sikop sa lima ka tawo.
Ang supplier ni Zabate nga si Leile Santos Libongcogon nadakpan ug nakuhaan og shabu ug laing upat nga naatlan nga nagsuyop sa sulod sa balay sa barangay Lorega San Miguel.
Samtang moabot sa P1,180,00 nga balor sa shabu ang nasakmit sa Pardo Police station pasado alas 4 kagahapon sa kaadlawon atol sa buy bust operation sa sitio Baskio barangay Basak Pardo sa syudad sa Sugbo.
Ang nasikop mao si Lyster Asenjo, 20, taga sitio Mangga barangay Punta Princesa.
Pasado ala una kagahapon sa kaadlawon aduna silay unang nadakpan sa Pardo apan sa gihimong pakisusi gitug-an sa dinakpan nga ang drugas gipanag-iya ni Asenjo hinungdan nga ila ning gipalitan. Sa pagtunol sa suspek sa usa ka pakete sa gituohang shabu, gisignit dayon kini ug gipahibawo nga pulis ang iyang gibaligyaan.