GIPASIGARBO sa National Food Authority (NFA) nga mas maayo ang kalidad sa ilang bugas labi na nga bag-o kining ni-abot sa rehiyon.
Sa pakighinabi sa SunStar Superbalita kang Dianne Silva, regional director sa NFA, siya niingon nga nindot ang kalidad sa bugas.
“Gwapo ang quality sa atong rice, ordinary rice lang siya ang quality naman,” pahayag ni Silva.
Gidugang pa nga bisan unsa nga bugas kung matipigan og dugay aduna kini natural nga baho nga mogawas.
“Usahay magsulti sila nga baho bisag dili NFA rice, bisag unsa’y klase nga rice basta matago na siya, ma store na siya’g one month, o sobra one month naa gyud na siya’y natural nga baho nga mogawas sa iya,” dugang niini.
Nasayran nga swerte matud ang rehiyon nga niabot na ang importasiyon sa bugas niadtong Hunyo ug gitakdang moabot na usab sa sunod bulan ang dugang importasiyon alang sa nahabiling bulan sa tuig.
Samtang nipasalig ang NFA nga matagan-an ang Northern Mindanao og insaktong suplay ug nindot nga kalidad sa bugas human nga gipangandaman na ang sunod tuig.
Matud ni Hazel Belacho, NFA-Northern Mindanao information officer, nga gitakdang moabot ang mokabat 250,000 metric tons o 5 million bags sa NFA rice karong umaabot nga bulan sa Oktubre-Nobyembre ning tuig 2018.
Gipasalig niini nga mahatagan og insaktong alokasiyon ang Rehiyon X diin nindot ang kalidad ug sa barato nga lamang ng presyo.
“Another 500,000 MT or 10million bags, also for buffer stocks, as to allocation for NorMin, wala pay advice. Pero rest assured, nga we will be allocated sufficient supply of low priced and good quality rice here in Region 10,” pahayag ni Belacho.
Gibutyag usab ni Silva nga daan na nga nag-ingon si Presidente Rodrigo Duterte ug Agriculture Secretary Emmanuel “Manny” Piñol nga kinahanglan nga pangandaman ang sunod tuig ug dili na kinahanglan nga mausab pa ang nahitabo.