MOABOT sa 100 ka mga balay ang pabiyaan aron malayo sa quarry site sa QM Builders sa may Sitio Tiguib, Barangay Lagtang, dakbayan sa Talisay.
Kini maoy nasabutan atol sa panagtagbo niadtong Biyernes sa buntag sa buhatan ni Mayor Eduardo Gullas ang mga residente sa lugar uban sa ilang lider nga si Nora Abatayo, Atty.Rudelyan Navarro, City Administrator; Atty. Giovanni Sususco, city legal officer; city engineer Gamaliel Vicente Jr.; Alvin Santillana, pangu sa City Disaster Risk Reduction and Management Office (CDRRMO) ug si Willy Abatayo, supervisor sa QM Builders.
Si Navarro nisulti sa mga tigbalita nga siya mismo nakakita sa dapit nga dilikado kaayo tungod sa kadako sa pagkapapas sa bukid. Gipasabot niya nga bisan di eksperto kon makita ang site, delikado kaayo.
Kini maoy rason nga si Mayor Gullas nipasuspenso sa operasyon sa quarry pinaagi sa pagluwat og cease and desist order.
Tungod niini, nauyonan nila nga ang mga residente nga nagpuyo sa 100 ka balay pabalhinon sa basket ball court sa Brgy. Lagtang samtang dunay luna nga gipanag-iya sa QM Builders nga ilang himuong relocation site.
Si Abatayo nipahibawo nga ang relocation site nahimutang sa Barangay Jaclupan maoy ihatag sa QM Builders.
Gawas niini, mohatag sab silag lima ka sakong bugas,mga nilata, construction materials ingon man mogamit sa ilang sakyanan nga kargahan sa mga mohikling.
Gipadayag niya nga tanang mga lakang sa Dakbayan ilang gisanong ingon man sa mga residente sanglit nagtan-aw sab sila sa kabalaka sa mga lumolopyo.
Apan gipadayag ni Abatayo nga nagpabiling luwas ang ilang quarry site ingon man lig-on ang bukid niini.