NAGKUMBOYA sila si Jeff Teague ug Derrick Rose aron pangulohan ang kadaugan sa Minnesota Timberwolves batok sa Golden State Warriors, 114-110, kagahapon sa pre-season sa National Basketball Association.
Si Teague nagpakatap og 17 puntos samtang nitunol og 16 puntos si Rose alang sa kadaugan,
Aduna pa’y laing upat ka mga magduduwa nga ning-amot og dobleng numero nga puntos alang sa Timberwolves, nga ningkombati nga wala ang ilang usa sa ilang All-Stars nga si Jimmy Butler.
Si Anthony Tolliver nitunol og 15 puntos alang sa Timberwolves, nihatag og 12 puntos si All-Star Karl-Anthony Towns, nitampo og 11 puntos si Andrew Wiggins samtang nihatag og 10 puntos si rookie Josh Okogie.
Wala moduwa si Butler sa Timberwolves gumikan kay nihangyo na kining daan sa management nga magpa-trade. Ubay-ubay ang teams nga gustong mokuha ni Butler.
Ang Warriors, nga maoy back-to-back champions sa regular season, gipangulohan ni Stephen Curry, kinsa nagpakatap og 21 puntos sulod lang sa 19 ka mga minutos nga pagduwa.
Si Klay Thompson nidugang og 17 puntos lakip na niini ang tulo ka three-point shots alang sa Warriors samtang niabag og 16 puntos si Kevin Durant.
Sa Vancouver, Britsih Columbia, nipakita na’g aksyon si Kawhi Leonard isip sakop sa Toronto Raptors, nga nahiagom sa 104-122 nga kapildihan batok sa Portlang Trailblazers.
Si Leonard, kinsa kanhi sakop sa San Antonio Spurs, miamot og 12 puntos alang sa Raptors sulod sa 19 ka mga minutos nga pagduwa.
Kini maoy labing unang higayon nga miduwa si Leonard sukad sa pagkaangol sa iyang bagtak niadtong Enero.
Ang mga pambato sa Trailblazers nga sila si Damian Lillard ug CJ McCollum mingpakita og aksyon sa premiro lang nga quarter. Nimugna og 12 puntos si Lillard samtang nihimo og siyam ka mga puntos si McCollum.
Sa laing duwa, ningmugna og 16 puntos matag usa sila si No.3 overall pick Luka Doncic ug Dennis Smith Jr. aron pangulohan ang dominasyon sa Dallas Mavericks batok sa Beijing Ducks, 116-63.
Si Doncic, kinsa 19 anyos nga nahimong EuroLeague MVP ug EuroLeague Final Four MVP, mirehistro og 5-of-7 fieldgoal ug 3-of-4 three-point shooting.
Si Smith mitali og 6-of-10 shooting, adunay unom ka assists ug wala kini nakamugna og turnover.
Nidugang og 15 puntos si Maxi Kleber alang sa Mavericks.
Si Justin Hamilton, kinsa kanhi magduduwa sa NBA, maoy nagulo sa Ducks pinaagi sa iyang 29 puntos ug 13 rebounds.
Sa lain pang sangka, nimugna og 19 puntos lakip na niini ang lima ka three-point shots si rookie Grayson Allen aron agakon ang Utah Jazz sa dakong kadaugan batok sa bisitang Perth Wildcats, 130-72.
Nitampo og 14 puntos si Rudy Gobert alang sa Jazz. (AP)