DAGHANG nakuratan sa giluwatang pahayag sa atong Pangulong Rodrigo Duterte (PRRD) niadtong milabay nga adlaw, tungod sa iyang kadismaya sa kurapsyon karon sa bisan asang ahensiya sa atong gobyerno.
Kitang tanan nasayud nga ang pinakabug-at nga problema sa atong nasud kurapsyon ug droga, ug sa wa pa ma presidente atong pinangga nga mayor niadto, gisaad na niyang daan nga iya kining tutokan nga programa ug ubanan siya sa iyang kawsa.
Gipahayag sa atong presidente ang pagkadismaya, sa ubang mga sakop niya sa gabinite nga kadaghanan natangtang tungod kay dili matinud-anon sa ilang serbisyo, didto sila nanguwarta sa mga dagkong kontrata, ug gipasabot niya nga bisan piso, wala siya’y gikawat gikan sa panudlanan sa atong gobyerno.
Apan didto kita nakuratan sa iyang pag-ingon nga: “My only sin is only extrajudicial killings”, ambot og nasipyat ba kaha ang atong presidente sa iyang gipanulti? O iya kadtong gituyo kay aduna sad siyay kaugalingong interpretasyon nga siya ra ang nahibawo.
Gikan pa sa iyang pagka-mayor sa Davao, nauso na ang Davao Death Squad (DDS), gamay ra ang tulo ka tawo nga mamatay kada adlaw, diin tudo-limod ang atong mabati gikan mismo kaniya.
Gani, niadtong tuig 2008 giimbestigahan siya sa Commission on Human Rights (CHR) nga si Senador Leila de Lima ang tsirman niadto, pero walay mga ebedensiya nga nagtumbok nga siya maoy utok sa pagpamatay sa Davao City.
Apan na-unsa bang pagka-unsaha, nga yano raman kaayo niya kining gi-angkon, nga matud pa sa International Human Rights, mikabat daw ngadto sa 4,854 ka mga tawo sukad niadtong 2016 hangtud sa katapusang tuig sa 2017 ang giingong biktima sa extrajudicial killings (EJK).
Sundan nalang nato ang sunod nga panghitabo, kay ang mga anti-Duterte karon, atat na atat na kaayo sa pagpalagpot kaniya. Atong i-ampo ang presidente nga dili mosipyat sa iyang mga ipangsulti.