UNFAIR.
Sa pinulongang Binisaya, dili makiangayon.
Sa ato pa, dunay nakapabor ug dunay nabintahaan o dili patas ang pagtratar.
Kanus-a man ta makaingon nga unfair o dili makaingayon? Ug kinsa man say makaingon nga kini dili makiangayon o kini makiangayon?
Kasagaran sa makaingon nga dili makiangayon mao kadtong dili makakuha og pabor.
Kabahin sa resulta sa research nga giyagyag sa University of the Philippines Population Institute (UPPI) nga nagbutyag sa nagkasaka na nga kaso sa HIV dinhi sa Sugbo, gihulagway ni Cebu City vice-mayor Mike Rama nga unfair o dili makiangayon.
Sa maong research nakita nga mga empleyado sa mga call centers aktibo sa panghilawas kon itandi sa uban nga wa magtrabaho sa call centers.
Gipasabot sa UPPI nga ilang nasuta nga kasagaran sa mga call centers nag-atubang og risgo sa ilang panglawas tungod sa ilang di saktong katulog, pagsigi og inom, dunay mogamit og illegal drugs ug ingon man ang pagpakighilawas ilabi na og laki sa lalaki nga maoy hinungdan sa HIV Aids.
Matod ni Rama nga kini nakapaalarma sa mga call center workers ug makapaubos sa outsourcing industry sa Sugbo.
Apan kon imong lantawon og maayo ang gipagawas nga resulta sa research, dili ang kompaniya maoy hinungdan niini kon dili ang lifestyle sa mga agents.
So, asa man ang unfair niini? Unfair diay kon ang research sa samang higayon nagpahimatngon niadtong mga call center agents kalabot sa ilang sobrang lifestyle?
Ngano man diay og gikan sa trabaho moderitso sila og uli ug sa balay na mopahuway og sakto. Ang maong research dako kaayo og gikatabang sa mga agents aron sila malikay sa kadautan. Kini maoy makiangayon lang. Fair!