ARON maproteksyonan ang mga menor de edad pangitaan na og idektipikasyon kon ID ang mga mosulod sa lodging house o mga Inn dinhi sa dakbayan sa Cagayan de Oro.
Kini human nitumaw ang taho nga dunay mga susamang establisimento nga didto nahitabo ang mga krimen nga nalambigit ang mga batan-on sama na lang pagpanglugos ug trafficking.
Niadtong niaging adlaw nagpahigayon og surprise inspeksiyon ang special task force aron susihon ang mga loding house nga gikataho nga dunay natigayong krimen ilabi na nga nalambigit ang mga menor de edad ug nakitang duna sila’y mga kakulangon sama na lamang sa logbook nga angayang aduna’y ngalan ug edad nga nakabutang.
Gibutyag ni abogado Edgardo “Egay” Uy, chair sa Regulatory and Complaint Board (RCB) nga kinahanglan gayud nga pangayoan og ID ug aduna’y logbook ang usa ka lodging house alang sa seguridad sa ilang mga kustomer.
“Gi -require gyud na siya kay ang usa ka tuyo man gud is ma protectionan ang minors,” pahayag ni Uy.
Gidugang pa niini nga aduna na’y ordinansa nga gipasa ang konseho kalabot na sa proteksiyon sa mga kabataan ilabi na mga menor de edad.
“Naa na na sa ordinansa nga gipasa sa city council katong comprehensive children’s welfare code, nga gani gitahasan ang RCB nga tan-awon ang pag-implementar niini mao ng naa ang RCB dinhi,” dugang niini.