MAAYONG pamation kung mag-viral imong video nga nakahatag og kaayohan sa kadaghanan. Apan, kon mosikat ka tungod sa imong tinunto, nan, kana maoy labing alaut.
Sa sitwasiyon ni Kongresista John Bertiz III, kining nagrepresentar sa mga Overseas Filipino Workers diha sa Kongreso, lisod kaayo dapigan.
Klaro sa video nga milakat sa mga social media ang gipakitang pagka-abusado ug pagka-aroganti ni Bertiz.
Nahitabo niadtong Sabado sa Ninoy Aquino International Airport terminal 2 diin gibutang sa “security condition level 2” ang maong dapit busa ang tanang pasahero ipaubos sa makuting inspeksiyon ug apil niini ang paghubo sa sapatos.
Imbes motuman sa security measure midiretso lang ug wa tagda ni Bertiz ang security inspector. Nagmagahi ug wala niya huboa ang iyang sapatos.
Dili ta motuo nga basin maulaw siya kay dunay kurikong iyang tiil busa nagdumili sa pagkuha sa iyang sapatos. Pero basi sa kuha sa CCTV, klaro nga gituyo gyud ni Bertiz nga laktawan niya ang checker.
Wala diha mahunong ang panghitabo. Iya pang ginudnod iyang ID ngadto sa security staff aron ipaila kon kinsa siya.
Unya, gikuha niya ang pangalan sa maong inspector o checker ug gireport ngadto sa management sa airport.
Tataw sa kuha sa CCTV nga sa wala pa moabot si Bertiz sa inspector ang tanang pasahero mituman gyud sa paghubo sa ilang sapatos.
Gani, makita man sa susamang video si Gobernador Imee Marcos nga wa magmagahi paghubo sa iyang sapatos.
Kining gipakita ni Bertiz klaro nga pang-insulto kang Presidenti Duterte.
Nahinumdom mo, nga nag-viral usab ang video ni Duterte nga mipaubos sa body inspection sa airport bisan pwede na unta siyang modiretso og sulod kay lagi pangulo sa nasod.
Insulto sab kini sa mga OFW nga iyang girepresentahan. Nahibaw ba mo kining mga OFW hingpit gyud ilang pagrespeto sa mga balaod samtang nanarbaho sa laing nasod.
Ang katungdanan ni Bertiz isip magbabalaod wala kaayo mohaom sa iyang batasan. Unta siya ang modelo sa pagtuman sa mga balaod.
Kon sa simple ug gamay nga security measure dili makatuman, unsa may garantiya nga mahimong matinumanon siya sa ubang balaod.
Hinuon, dunay katarungan ug rason ni Bertiz.
Iya kunong gisusi ang “Chinese looking” nga mga pasahero nga gi-eskortan sa taga NAIA nga wala sitaha sa inspector.
Mipaubos na pud kuno siya sa metal detector, gawas pa duna pud siyay ID sa airport busa di na kinahanglan ang dugang inspektion.
Sir, kon malibang ka kinahanglan mangilo og tarung aron dili manimaho.
Dili sabton nga kon duna kay rason dili kana mopaubos sa inspeksiyon. I-plas ang iniduro inig human og gamit aron di maglutawlutaw imong hugaw.
Ingon ana ra na ka simple pagtuman sa sistema aron limpyo ta mogawas sa pangsayan ba.