GIKLARO sa regional director sa Commission on Elections (Comelec) nga bisan kon mokatap pa ang giingong mga signal jammer karong eleksyon, di kini makapakgang sa pagpahigayon sa poll automation.

Kini tungod kay matod ni Director Rene Buac ang signal jammer igo rang mobalda sa signal o transmission nga gamiton sa Comelec sa pag-transmit sa resulta sa piniliay gikan sa mga presinto paingon sa canvassing center.

Click here for stories and updates on the Sinulog 2010 Festival.

Ang signal jammer di makausab sa resulta sa eleksyon, matod ni Buac, maong di angay kabalak-an ang pagkatap unya niining mga ekipo.

Kon duna say mahitabong jamming sa signal, matod ni Buac, di kini makalahutay og dugay.

Gawas pa usab, matod ni Buac, di magdungan og transmit ang mga presinto sa ilang resulta ngadto sa canvassing center.

Apan kon sud sa tulo ka higayon nga mapakyas ang transmission, matod ni Buac, mahimo rang kuhaon ang memory card gikan sa precinct optical scan machine ug personal nga dad-on paingon sa canvassing center.

Hinuon bisan pa niini, nangayo na og panabang si Buac ngadto sa Police Regional Office (PRO-7), Central Command ug National Telecommunications Company (NTC) aron ipasusi kon duna bay nikatap nga signal jammer dinhi sa Sugbo. “As far as I’m concerned, wa pa koy nadawat nga report nga nay signal jammer,” nagkanayon si Buac.