Espinoza: Manghinaut ta nga di mausban

MANGHINAUT ta nga di mausban. Ang giplanohan nga kiha batok sa Apo Land and Quarry Corp., Cemex (Cemento Mexico), Mines Geosciences Bureau (MGB), Department of Environment and Natural Resources (DENR), ug dakbayan sa Naga, Cebu, maoy sinugdan unya sa kaso nga paga-atubangon sa mga responsable nga mga kompaniya ug opisyales sa kagamhanan kon duna pay moabot unya nga susama nga kalamidad.

Si Atty. Ben Cabrido mipasabot na sa iyang FB account sa wa pa siya mosulti ngadto sa media nga iyang pasakaan og kaso nga danyos ang gihinganlan na ug mangayo siya og danyos nga bali usa ka bilyun ka pesos nga bahinon ug tinunga sa mga biktima sa pagdahili sa bukid sa Sindulan ug sa pag-ayo sa dapit nga morag napapha sa mapa tungod sa pagdahili sa bukid niadtong Sept. 20.

Gawas sa binilyun nga danyos nga pangayoon sa abogado alang sa mga biktima mao ang gitawag nga “protection order” gikan sa korte nga maghatag og kasiguroan sa mga namuyo duol sa minahan kon quarry nga mahalikay sila sa kadaut ug mahatagan sila og proteksyon kon dunay lain pa nga mahitabo.

Maayo unta kon madiskobre ni Atty. Cabrido ang tinuod nga mga tag-iya sa Cemex, nga gidudahan nga ang usa sa mga tag-iya usa ka dako ug adunahan nga pulitiko.

Bisan kon giabi-abi sa Apo Land and Quarry Corp. ang kiha ang ipasaka ni Atty. Cabrido sa korte apan si Chito Maniago, ang tigpamaba sa maong kompaniya, nagpasabot nga wala sila nagpasagad sa ilang trabaho. Matud sa taho, misaka na sa 77 ang ihap sa mga tawo nga namatay ug duna pay daghan nga wa makit-i.

Ang nahitabo sa Tinaan, Naga city usa ka kalamidad nga walay usa ka tawo nga angayan mabasol sa maong trahedya. Kining maong kalamidad nga di lang sa Tinaan, Naga city nahitabo apan nahitabo usab didto sa Baguio dunay mga sinugdan ug timailhan apan ato lang gibaliwa.

Kining nahitabo sa Tinaan, Naga city ug sa Baguio city usa ka masakit nga kasinatian sa mga nahingtungdan apan wa tay lain mahimo gawas sa pagdawat sa maong panghitabo. Kini usa usab ka timailhan nga ang atong kinaiyahan naningil na sa way pag-atiman ug hatag bili sa atong kalikupan.

Daghan ang nahingangha sa pag-angkon ni kanhi Naga city Mayor Val Chiong nga ang nahitabo sa bukiran sa Barangay Tinaan miabot tungod sa pamulitika. Matud pa, dunay mando sa Apo nga papawahaon na ang mga namuyo sa maong dapit diin naa diha ang quarry alang sa ilang materyales sa semento.

Apan, matud pa, tungod sa nagsingabot nga piliay ug sa hangyo sa mga lumulopyo napugngan ang pagpabalhin kanila sa lain nga dapit nga halayo unta sa nahitaboan.