Roldan: Yellow October?

"USA kini ka porma sa pagdumala sa kagamhanan nga gisalmutan sa mga importanteng personalidad gikan sa nagkadaiyang grupo nga nitabang sa pagpalagpot kaniya.

BULAN na sa Oktubre. Bulan nga gipadayag ni Presidente Rody Duterte nga ipahigayon ang Oplan Red October.

Plano kuno kini tali sa mga "Yellow-han," "Pulahan" ug Magdalo Group ni Senador Sonny Trillanes IV nga palagputon siya sa puwesto.

Gisulti kini sa presidente sa usa niya ka pakigpulong sa niaging bulan nga duna siyay ebidensiya nga nagkunsabo kining tulo ka grupo aron palagputon siya karong bulana. Matud pa sa presidente nga nakakuha siya'g dokumento o "recorded" nga panag-istoryahan sa maong laraw gikan sa langyaw'ng nasud nga may simpatiya sa Pilipinas.

Gitawag kini'g Red October kay dako'g papel ang grupo ni kanhi Communist Party of the Philippines (CPP) chairman Jose Maria Sison nga nisaway sa administrasyon sa daghang "human rights violations" ug sa nabugha nga hinabing pangkalinaw.

Kung wa ko masayop, makasaysayanon ang bulan sa Oktubre sa mga komunista kay niining bulana nidaug ang armadong pakigbisog sa mga Bolshevik o ang mga mamumuo nga gipangulohan nila Stalin, Lenin ug uban pa didto sa Russia batok sa nagharing pamilya sa 1917.

Kung wa ko masayop gikan kining pulong sa salida sa sine niadtong 1990's nga "Search for Red October" ni Sean Connery. Istorya kini sa usa ka "nuclear submarine" sa USSR nga gipangulohan sa ilang kapitan nga si Connery nga nisulod sa teritoryo sa Amerika aron mosurender.

Sa laing bahin, ang Oplan Red October nga gisulti sa presidente dili ang pagsurender sa kumander sa submarine kon dili ang pagpasurender sa iyang administrasyon ug itukod ang "coalition government" nga gipangayo kaniya sa CPP.

Usa kini ka porma sa pagdumala sa kagamhanan nga gisalmutan sa mga importanteng personalidad gikan sa nagkadaiyang grupo nga nitabang sa pagpalagpot kaniya. Sukwahi kini sa naandang paagi nga iagi sa piniliay o eleksiyon ang pagpili sa magdumala sa gobyerno.

Ang mga pangulo o representante nga ituboy sa ilang grupo sama sa mga trabahante, mag-uuma, propesyonal, magtutudlo, ug uban pa ang mahimong sakop sa "coalition government" nga gikabalak-an ni PRody.

Sa Oplan Red October, ang Liberal Party ni kanhi PNoy nga gitawag og mga Yellow-han, Magdalo Group ug CPP maoy magtukod sa "coalition government" aron ilisdan ang kasamtangang "bicameral system" karon.

Siyempre nitayabaw ang hingtungdang mga grupo ug nisulti nga laing "fake news" na sab kini sa iyang administrasyon. Sumala ni Sen. Trillanes nga "no-way" nga makig-abin ang iyang grupo sa mga pulahan. "Yellow October" na lang kaha? Ang kampo sab ni Vice President Leni Robredo nanghimakak sa bag-ong banat kanila.

Sa akong kabahin, adunay kamatuoran nga nag-istoryahanay ang tanang kritiko ni PRody. Una napalagpot si kanhi Presidente Marcos sa puwesto sa 1986 natukod ang "Anti-Dictatorship Coalition."

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph