NGILNGIG ang nahitabo didto sa Sulawesi island sa Indonesia niadtong milabay'ng semana kay gawas nga nakasinati og 7.5 nga linog, giigo sab og tsunami.
Base sa taho sa National Disaster Management Agency sa maong nasud nga moabot na sa 832 ka mga tawo ang namatay samtang
540 sab ang nangaangol.
Apan gikabalak-an ni Vice President Jusuf Kalla nga ang death toll ug ang mga naangol mosaka pa tungod padayon pa ang retrieval ug rescue operation gumikan kay bisan ang mga gambalay, tulay, ospital, hotels, shopping centers ug mosque wala gipasaylo sa kalamidad.
Gikabalak-an sab sa mga awtoridad ang mga kadaut sa uban pang mga coastline sa Palu sama sa rehiyon sa Donggala nga wala dayon maadtoan sa mga rescuers.
Giingong moabot sa 10 ka tiil o 3 metros ang gitas-on sa tsunami nga milampurnas sa Palu.
Sa maong hitabo, di lang ang Indonesia ang nagmasulob-on, kon dili ang tibuok kalibutan.
Usa ang Indonesia sa disaster prone country tungod kay naa kini sa parte sa giingong Pacific Ring of Fire, kon diin ang Pilipinas apil sab niini.
Busa kon lakip ang nasud niining Pacific Ring of Fire, ang pangutana, unsa na kita kaandam kon ugaling mohapak sab ang susama niini nga kalamidad dinhi?
Ang gobyerno naglusad na og mga synchronized nga mga earthquake drill ug mga pagbansay-bansay sa pagluwas sa kinabuhi panahon sa kalamidad. Duna nay mga gitumbok nga mga lugar nga posibleng daganan o himuong mga evacuation centers, apan igo na ba kini aron nga mahimo kitang andam?
Duna na ba kitay mga sopistikadong mga gamit nga maoy gamiton pananglit dunay ingon niini nga mahitabo sa nasud?
Unta kining mga panghitabo sa atong palibot magsilbi nga sukaranan aron nga makamugna kita og malangkubon nga mga lakang isip pagpangandam.
Apan kinahanglan sab ang hugot nga pag-ampo ngadto sa Ginoo