NANGAHASOL ang pipila ka mga residente sa usa ka subdivision sa lungsod sa Consolacion, Sugbo tungod paghamok sa giingong mga engkanto nga nagpuyo sa dapit.
Nasayran sa mga residente nga sa unang panahon labayanan sa mga tawo nga gipamatay ug kakahoyan.
Ang ngalan sa subdivision gipugngan tungod sa hangyo sa mga residente ingon man usab sa mga tawo nga hingtungdan nga padayong nagpuyo sa dapit.
Tungod sa mga hitabo nga lisod ipasabot, dunay pipila nga ninglalin na ug dunay balay nga ibaligya sa tag-iya tungod sa mga hitabo nga gikalambigitan sa mga “tawo nga itom” nga naghulga kanila sud sa pinuy-anan.
Usa sa mga balay nga dos andanas maoy gitumbok nga “haunted house” tungod sa sunodsunod nga mga hitabo ug mas kusog nga presensya sa mga espiritu nga itom.
Ang balay nga nagkantidad karon og P3 milyunes gitinguhang ibaligya sa tag-iya tungod sa sunodsunod nga mga hitabo.
Usa ka tinubdan nibutyag nga dihay bisita nga natulog sa haunted house nga maoy gibilin samtang wa diha ang tagbalay.
Apan samtang siya natulog usa niana ka udto, iyang namat-an nga dihay nituok sa iyang liog ug nigunit sa iyang mga kamot.
Nisuway siya sa paglugnot, apan wa siya makapi-og tungod sa kakusgan sa nikupot kaniya sulod sa pipila ka mga minuto.
Wa siyay nakitang tawo, apan sa dihang siya gibuhian sa nigunit kaniya, diha na niya ang itom nga ingon sa anino sa tawo nga naglutaw sa hangin.
“Naagian to nako siya mga alas 2 sa hapon diha sa may gate. Gipaningot og maayo. Niana na siyang gabii nisulti nga gibugno diay siya sa wa niya makita,” matod sa silingan nga gisultihan niini.
Laing katabang sa balay napugos sa pagpahawa sa maong balay tungod usab sa kahadlok kay panahon sa iyang pagkatulog, makamata siya sa kasaba nga adunay magguyod og lamesa, kagulkol sulod sa aparador, kalit mawalis ang kurtina bisan kon way hangin kay sirado ang mga bintana.
Usa ka 6-anyos nga bata nga nagpuyo sa laing balay nga naa ra sab sa duol nakakita sa samang anino nga lubos itom ug nihana sa paggunit sa iyang nawong apan iyang nawakli.
“Nahibung akong igsuon kay duna may gitapi ang akong pag-umangkon nga nipawong sa suga sa banyo samtang sila nangaon. Naa kunoy itom nga tawo nga miagi tungod sa iyang mama unya niadto sa banyo dayong hikap unta sa iyang nawong,” nagkanayon ang uyoan nga giinterbyu sa Sun.Star Superbalita.
Laing residente nitug-an usab nga samtang siya nanghugas sa iyang sakyanan usa ka adlaw niana, kalit siyang gipagngan og suga.
Usa ka dalaga ang nitug-an usab nga sa dihang anaa siya sa ikaduhang andana sa ilang balay, gisangpit ang iyang ngalan makatulo ka mga higayon hinungdan nga nikanaog siya sa silong, apan way tawo nga iyang nakita.
May magtiayon usab nga sakay sa motorsiklo ang nakakita ug anino nga lubos puti nga nagtungas paingon sa gate, apan dihang naigo sa taxi, kalit usab nga nahanaw. (JFT)