NIMANDO ang pangulo sa Cebu Provincial Police Office (CPPO) sa tanang mga police station sa lalawigan sa pag-moabag sa kapulisan sa Medellin sa pagpangita kang Brgy. Kapitan Nonito Yaon.

Si Yaon, sa barangay Antipolo, nakaeskapo dihang gironda sa kapulisan sa Medellin pinangulohan ni Senior Supt. Bonifacio Ariesgado ang iyang balay sa miagig adlaw.

Click here for stories and updates on the Sinulog 2010 Festival.

Ang kapulisan nakakuhag armas, granada ug shabu paraphernalia.

Diha na unta si Yaon apan giingong ningbabag ang iyang pamilya ug mga supporter.

Gusto nilang naay abogado una pa nila ipadala ang kapitan.

Ni-request og back-up nga mga sundawo ang kapulisan sa kabalaka nga magubot ang pagdala nila kang Yaon.

Mga alas 2 na sa hapon niabot ang abogado, apan dihang ila nang gisud ang balay, wa na ang opisyal tungod kay nakasibat agi sa luyo sa balay.

Si CPPO Director Senior Supt. Erson Digal niingon nga iya nang gimandoan si Senior Insp. Bonifacio sa pagpahigayon og hot pursuit operation sa pagsikop kang Yaon.

Nakig-alayon na usab sila sa kapulisan sa Mandaue ug dakbayan sa Sugbo aron motabang pagpangita sa kapitan.

Hinuon gitataw ni Digal nga iya nang gimandoan ang iyang imbestigador sa pagpahigayog imbestigasyon sa hepe aron masuta kon wa ba siyay tulobagon sa hitabo.

Si Bonifcaio sa iyang bahin niingon nga andam siyang moatubang sa inbestigasyon.

Apan alang kaniya insakto ang ilang gihimo ug wa siyay nakitang sayop nga niresulta sa pagka-eskapo ni Yaon.Si Yaon nasikop na sa miaging tuig tungod sa paggamit og drugas ug paghupot og armas.

Gawasnon siya human nakapiyansa.