DUHA ka adlaw sa dili pa ang katapusang adlaw sa pagpangrehistro sa Commission on Elections (Comelec), nibalhin sa pagparehistro sa Tagoloan, Misamis Oriental si kanhi Cagayan de Oro 2nd District Congressman Benjo Benaldo.
Kini ang gikumpirma ni Edmundo Pacamalan, ang tigpamaba sa Partido PaDayon Pilipino, ug niingon nga siya mismo ang niuban kang Benaldo.
“Tinuod kana nga nibalhin siya sa iyang registration sa lungsod sa Tagoloan ug ako ngani siya giubanan,” matud ni Pacamalan.
Tungod niini, nigawas ang mga pagtuo nga posibleng magpapili sa usa ka posisyon sa Distrito 2 sa Misamis Oriental si Benaldo.
Wala man kini mihatag ug kumpirmasyon kung unsay daganan ni Benaldo sa umaabot piliay apan gituohang sa kongresista sa ikaduhang distrito nga moatbang kini sa kasamtangang kongresista nga si Juliette Uy.
Dugang ni Pacamalan nga si Benaldo tulo na ka tuig nga residente sa lungsod sa Tagoloan tungod kay nagserbisyo sa probinsya isip parte sa board of directors sa Phividec Industrial Authority.
Apan tak-om na dayon ang baba ni Pacamalan kung posibleng magpapili ba kini sa umaabot nga eleksyon.
Hinuon gibutyag ni Pacamalan nga mahibaloan lamang kini sa adlaw mismo sa pagduso sa sertipiko de kandidatura.
Uwahing interbyu kang Benaldo gibutyag niini nga igo lang siyang mosunod kung unsay ipadagan nga posisyon sa partido kaniya.
“I am a good soldier I will always follow unsay iingon sa partido,” matud ni Benaldo.