MAKAPIKAL nga makahimuot kining paghana pagpanghunaw sa Mines & Geosciences Bureau (MGB) sa trahedya sa Sindulan. Si Mayor Kristine Chiong maoy pakasad-on nila.
Ayaw mo sa kagahapong mga rekomendasyon (naa ba?}. Ang karong analysis ninyo nga sayop maoy dawata. Pangayo mog pasaylo sa kaliwatan sa mga biktima, uy! Duna pay modayeg ninyo.
Laing makapikal nga makahimuot nga isyu mao kining giingong mga pekeng mga biktima. Abtik ni silang mga kabos kay bahalag kauwawan basta maluwas sa kagutom.
Kapanaminan ni sa atong mga lider nga nagpahimus sa gahom. Imbes tabangan kining mga kabos gipasagdan lang kay way klarong poverty alleviation program.
Arang-arang lang ni sila tandi sa nanulis sa mga donasyon sa Yolanda victims sa Leyte. Diha toy sulti-sulti nga daghang namilyunaryo adtong higayuna.
Morag tinuod to kay daghan kaayong mga biktima nga nangreklamo namiyahit nga wa sila makadawat sa ubang mga donasyon sama sa bugas, biste housing ug kuwarta.
Halos tibuok kalibutan baya ang ning-donate sa mga biktima sa Yolanda, ang labing kusog ug bangis nga bagyo sa kasaysayan sa nasod niadtong 2013.
Mga pulitiko, civic leaders, volunteers, gov’t officials nga kukhan maoy nabuhong sa maong kalamidad. Tingali karon nangandoy ni sila nga may lain pang katalagmang moabot sama sa Yolanda.
Kay anad sa pangurakot ning mga tawhana di sila dutlag konsiyensiya. Tiaw mo na alang sa mga biktima giapil pagsakiyo? Kaway pus nila.
Nanghinaot ta nga ning Sindulan tragedy way masaag nga donasyon sa laing bulsa sa mga volunteer, civic leaders, pulitiko ug mga peke nga mga biktima.
Dihay tigdawat sa mga donasyon niadto nga nangasuko kay hugaw kuno nga mga sapot ang gi-donate maayo pa kunoy kuwarta lang. Pastilan, kamaldito!
Lain pay ato, unta mag-una sa pag-ampo kadtong mga lider sa San Fernando nga maoy nagpasud sa duha ka planta sa semento nga way landslide sa kabukiran. Aron di sila gabaan!