Cebu Province mohatag og insentibo sa ilang medalists

MAKADAWAT og insentibo ang mga atleta sa Cebu Province nga nakalangkat og mga medalya sa bag-uhay lang nahuman nga Batang Pinoy National Championships sa Baguio City.

Mao kini ang gipabuhagay ni Provincial Governor Hilario Davide III kagahapon atol sa courtesy call sa mga atleta sa iyang opisina sa Cebu Provincial Capitol.

Ang gold medalists makadawat og P5,000 matag usa, P3,000 sa silver medalists ug P2,000 sa bronze medalists.

Ang Cebu Province nahiluna sa ikaunom nga puwesto dala ang 24 golds medals, 10 ka mga silver ug 21 ka mga bronze.

Ang national sporting meet nga lang sa Under-15 nga mga atleta ug gipasiugdahan sa Philippine Sports Commission (PSC) gipahigayon sa miaging buwan sa Baguio City.

Gisalmutan kini og gatusan ka local government units sa nagkadaiyang suok sa nasod.

Nakahakot og mga medalya ang Cebu Province sa arnis, athletics, boxing, basketball, chess, futsal, karatedo, sepak takraw, lawn tennis, cycling, duathlon ug triathlon. RSC