Dura: Nindot nga away

HUMAN nabalita niadtong miaging adlaw nga mokandidato sa pagka-kongresista sa unang distrito si resigned Vice Mayor Paolo Duterte kontra PBA Party-list Rep. Jericho “Koko” Nograles, usa sa akong suod nga higala nga dumadapig sa mga Nograles ang nag-text nako bahin sa maong balita.

Sa among teksanay, suma niya, nakuyawan siya nga mangampanya tungod kay di sab basta-basta nga politiko ang batan-ong Duterte.

Wa sab sila masayud kung unsa ang estratehiya sa ilang kontra karong eleksyon. Ug tuod man, ako siya giingnan nga nindot ning awaya tungod kay malingaw ang mga dumadapig sa duha ka magkaribal nga pamilya sa politika.

Ug aron nga di sila mahadlok, angay nga di sila magpadala sa kainit sa politika, mangampanya lamang sila sa ilang kandidato ug di na mangdaut sa pagkatawo sa ilang kontra.

Bitaw, akong nasabtan ang akong amigo tungod kay init man gayud ang politika kaniadto sa panahon sa mga amahan (Pres. Rodrigo Duterte ug Speaker Prospero Nograles) nga pila ka tuig nga nagbungol tungod lang sa politika.

Apan dihang mikandidato si Mayor Duterte sa miaging 2016 elections, naningkamot ang mga Nograles nga makig-uli sa maayong kabubut-on ug kamatuoran niini, ilang gisuportahan ang mayor sa iyang pagka-presidente.

Sa mga panagpulong, giingon sa mga Nograles nga di na sila moapil sa bugno sa pagka-mayor basta di lang sab sila atbangan sa pagka-Kongresista. Nan, karon kay giatabangan man sila, unsa kahay mahitabo karong umaabot nga eleksyon?

Pero, alang nako, kining nahitabo nga pag-atbangay sa duha ka pamilya maoy tinuod nga esensya sa demokrasya sanglit dunay mapilian ang katawhan kung kinsa kanila ang angayan modala sa tingog sa katawhan sa Kongreso.

Kay kung magsabot-sabot lang sila nga mga pamilya, makaingon kita nga gihikaw na sa katawhan ang ilang kagawasan sa pagpili kung kinsa ang ilang iboto.

Angay nga walay mosibog kanila aron makita nato kung kinsa ang mas gipangga sa mga Dabawenyo sa duha ka bag-ong henerasyon sa mga politiko.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph