MOKABAT sa duha ka oras ang nahimong State Of the City Address (SOCA) ni Davao City Mayor Sara Duterte-Carpio diin iyang gibatbat ang nahimong kalamposan sa dakbayan ilawom sa iyang pagdumala.
Unang gibida sa mayor ang taas nga gross domestic product (GDP) ning dakbayan nga niabot og 10.9 porsyento kumpara sa 6.7 ka porsyento nga GDP sa nasud.
Kini gumikan sa daghang mga negosyo ug mga patigayon nga gitukod ug gimuntar ning dakbayan.
Gibutyag sab niini nga sugod sunod tuig maghatag na og scholarship ang dakbayan ngadto sa mga atleta ug sa miaging mga katuigan ubay-ubay na ka mga scholarship grant ang nahatag sa mga tinun-an ug nagmalampuson.
Gipahibalo sab sa mayor ang plano niini sa dakbayan nga magtukod og bag-ong gambalay alang sa lokal nga panggamhanan, kini naglangkub sa bag-o ug moderno nga library, bag-ong city engineers building ug sa city health.
Karong tuiga, dunay mokabat ngadto sa P570 milyon nga mga proyekto sa imprastraktura ang napatuman sa dakbayan sa Davao.
Samtang padayon ang pagbuhat ug pagtuon alang sa pagtukod og kaugalingong city college ug hospital.
Gidayeg ug gipasalamatan usab sa mayor ang kapulisan ug kasundalohan sa ilang paningkamot nga mamahimong malinawon ang dakbayan, diin partikular nga gidayeg sa mayor ang Davao City Police Office sa pagkapili niini isip Best City Police Office sa tibuok nasud ug ang Task Force Davao.
Giagni sa mayor ang katawhan sa Davao nga makigtambayayong kanunay sa lokal nga kagamhanan aron nga mapatuman ang mga plano ug proyekto alang sa kalamboan ning siyudad.
Nagpasalamat sab kini sa suporta sa mga Dabawenyo dungan sa paghangyo nga unta hatagan pa siya ug laing higayon ug magpadayon sa pagserbisyo sa katawhan sa Davao isip mayor.
Dungan niini, malipayon sab si Davao City First District Councilor Atty. Melchor Quitain Jr., sa iyang nadungog atol sa SOCA sa mayor.
“Well-covered and speech ni Mayor, ug dali ra kaayo masabtan,” segun ni Quitain Jr. Richy Nalagon