GIUSBAN pagbuntog sa Denver Nuggets si LeBron James ug ang Los Angeles Lakers, 113-111, kagahapon sa National Basketball Association (NBA) pre-season tournament.
Ang Nuggets, nga ningmakmak sa Lakers, 124-107, sa premiro nilang panagsangka niadtong Lunes, gipangulohan ni Mason Plumlee pinaagi sa iyang 23 puntos, nidugang og 20 puntos si Nikola Jokic samtang niamot og 15 puntos si Malik Beasley.
Si James, kinsa sulod lang sa 15 ka mga minutos nga nipakita’g aksyon, nitampo og 13 puntos alang sa Lakers nga gipanbgulohan ni Javale McGee pinaagi sa iyang 15 puntos.
Nitampo og 14 puntos si Josh Hart alang sa Lakers samtang niamot og 11 puntos si Rajon Rondo.
Sa laing duwa, gipakita ni Carmelo Anthony nga haom siya sa sestima sa Houston Rockets.
Si Anthony nitampo og 13 puntos sa dakong kadaugan sa Rockets batok sa Memphis Grizzlies, 131-115.
Ang Rockets gipangulohan ni Chris Paul pinaagi sa iyang 22 puntos samtang nidugang og 20 puntos si James Harden.
Si Anthony, kinsa mibiya sa Oklahoma City Thunder, nakamugna og tulo ka three-piint shots nga timailhan nga haom siya sa sestima sa Rockets nga naila sa three-point shooting.
Sa lain pang duwa, gipangbuntog ang Cleveland Cavaliers ang Boston Celtics, 102-95.
Gipakita sa Cavaliers nga bisan mibiya na sab kanila si James, aduna gihapon sila'y ikabuga ug andam na silang mohamag sa bag-ong season.
Gipangulohan ni Kevin Love ang kadaugan pinaagi sa iyang 17 puntos samtang nidugang og 15 puntos si Collen Sexton.
Sa 1st half, ang Cavaliers nakaposte og 21 puntos.
Hinuon, hinayhinay nga ninggukod ang Celtics hangtod nga ningsikit og balik ang duwa.
Sa lain pang mga kombati. gipabugnaw sa Charlotte Hornets ang Miami Heat, 122-113, samtang gipasayaw sa Utah Jazz ang Toronto Raptors, 105-90. AP, ESL