SA ikawalong sunodsunod nga semana, misaka na usab ang presyo sa lana niadtong Martes nga maoy laing epekto sa pag-umento usab sa presyo sa maong produkto sa world market.
Sa ato pa, ang presyo sa gasolina modagan og P59 ngadto sa P62 ang matag litro ug ang diesel moabot sa P47.95 ngadto na sa P50.75.
Dili nato mabasol ang gobiyerno niining pagsaka sa lana kay lagi epekto man kini sa world market. Sa ato pa, ang tanang nasod ang naigo niini.
Pero dili nato ikalimod nga ang sobrang pagsaka niini mugna sa pag-implementar ug pagpasunod sa kasamtangang administration niining ilang bag-ong balaod nga mao ang Tax Reform for Acceleration and Inclussion (Train) law.
Sa laktod nga pagkasulti, tungod sa presensiya sa Train Law, nadoble ug na-triple pa gani hinuon ang pagpausbaw sa presyo sa lana ug sa ubang mga produkto.
Kining pagsigig saka sa presyo sa lana ug ang pagpasunod unya sa laing Train Law sa sunod tuig, krusyal alang sa mga drivers sa mga sakyanan depasahero-an.
Tungod kay hangtod karon, wa pa gyud sila tugoti ang mga drivers nga makapaumento sa pletihan.
Ang Pagkakaisa ng Samahan ng mga Tsuper at Operators Nationwide (Piston), pinaagi sa ilang spokesman Gregg Perez, miingon nga wa sila mangayo og umentong plitihan sa LTFRB kay dili sila gusto nga maigo ang mga commuters.
Pero ambot og nakahibawo ba ning Piston nga daghan nang mga PUJ drivers ang nitiyabaw karon tungod kay ang gamayng kita sa ilang kahago atoa naman gikaon sa gasolina.
Sama sa commuters, ang mga drivers pamilyado ug nagbayad usab og buhis, pero nganong sila man ang gisakripisyo, kon atong basehan ang pamahayag sa Piston. Fair kaha ni?