Elorta ug Team Dumadag nanguna sa Guevarra Cup

GIPALUKAPA ni National Master (NM) David Elorta ang iyang kaubang seven-pointers nga sila Grand Master (GM) Darwin Laylo ug Davao City's Fide Master (FM) Austin Jacob Literatus pinaagi sa superior tiebreaks aron makuha ang titulo sa open division sa nahuman nga 6th Atty. Jong Guevarra Cup Mindanao Chess Festival sa Gaisano Mall of Toril Food Hall, Davao City.

Nadawat ni Elorta ang P15,000 samtang si Laylo ug Literatus mibulsa og P10,000 ug P5,000, sa maong han-ay.

Ang mikompleto sa top 10 mao sila Sherwin Tiu (6.5), NM Ernesto Absin (6.5), Jayson Salubre (6.0), NM Julius Sinangote (6.0), Jhonnel Balquin (6.0), NM Macacuna Macala (6.0) ug John Michael Silvederio (6.0).

Samtang si Davao City's Wesley Jovan Magbanua sa Jose Maria College (JMC) mao ang midaug sa kiddies under-14 division.

Ang 13 anyos nga taga-Los Amigos, Tugbok District, mitala og kinatibuk-ang 5.5 puntos sa six-round Swiss System Format chessfest gi-organisa ni Atty. Jong Guevarra Jr. isip kabahin sa pagselebrar sa “Fiesta Saya” activity sa Toril District.

Gipayukbo niya ang mga mirekord og 5 puntos nga sila Marj Manguilimotan ug Aliyah Rae Lumangtad kinsa mikuha sa sunod nga duha ka puwesto.

Nakuha ni Magbanua ang P2,500 samtang Manguilimotan nakadawat og P1,500 ug Lumangtad nga P1,000.

Ang Top kiddies under 14 player nga si Vneshdyl Bureros mirekord og 4.0 points aron mouli og P1,000.

Samtang ang Team Dumadag ang nakakuha og pinakadakong premyo human midaug sa tatluhan event.

Sila Nazario Ubanan, Allan Cantonjos ug Dennis Bernas mibulsa og P65,000 batok sa parehong 16-pointers Super London's Don Tyrone Delos Santos, Samson Lim Jr. ug Don Hamilton Arias, ug Pacman Chess Team sa Elias Banguiran, John Christian Lesaca ug Diovic Nalam.

Ang Super London nakadawat og P35,000 samtang ang Pacman Chess Team makakuha og P20,000.

Ang kompetisyon gipresenta sa Toril Poblacion Barangay Council sa pagpangulo ni Lilibeth Al-ag sa selebrasyon sa Sto. Rosario Parochial Fiesta sa Toril District ug gisuportahan ni Davao City third district Rep. Alberto Ungab. (ABM)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph