HUMAN sa 13 ka adlaw nga operasyon, nanguli na kagahapon ang 45 ka mga sakop sa Bureau of Fire Protection (BFP) nga gikan sa silingang mga rehiyon sa Central Visayas nga nitabang sa pagpangita sa mga molupyo sa Barangay Tina-an, siyudad sa Naga nga natabunan sa nidahili nga yuta.
Gibutyag ni Fire Chief Supt. Samuel Tadeo, regional director sa BFP 7, duha ka adlaw human sa nahitabong landslide niadtong Septiyembre 20, nangabot ang maong mga sakop nga gikan sa rehiyon 6, 8 ug 10 ug nilahos sa ground zero sa Barangay Tina-an.
Hangtod alas 3 kagahapon sa hapon, 77 na ang namatay, 18 ang naangol ug unom na lang ang gipangita sa rescuers sa Barangay Tina-an.
Sa pagpamauli sa mga rescuer sa BFP, bitbit nila ang mga kasinatian nga ilang nakat-unan sa pag-apil sa search and retrieval operation sa landslide sa Barangay Tina-an.
Sigon ni Fire Insp. Sam Laurence Velarde, hepe sa search and rescue unit sa BFP 10, sa ilang pagpangita sa mga molupyo nga natabunan sa yuta, positibo sila nga kini mabangalan ug maugkat kay nasayod sila nga dunay mga kabanay ang nangita niini.
Siya nisaysay nga dihay iyang sakop ang niasoy nga dunay usa ka babaye nga patay na nga dugay kaayo nakuha ug dihang giingnan nga “Mam, pagpakuha na,” kini nakuha.
Matod niya, fulfillment ang ilang mabati sa higayon dunay maugkat nga mga lawas nga na-missing kay nasayod sila dunay mga kabanay ang nangita niini.
Siya nipahinumdom sa publiko nga kon dunay makita nga timailhan nga dunay dautang mahitabo, mohiklin na ngadto sa luwas nga lugar aron malikayan ang trahediya sama sa nahitabo sa Naga.
“Dapat more focus sa prevention. Try to mitigate prevention if naay threat diha dili lang siya sa landslide, bagyo o sunog. Importante sa atong community ang prevention,” pahayag ni Velarde, nga nibiyahe pa kuyog sa iyang team gikan sa dakbayan sa Cagayan de Oro, dala ang ilang kagamitan.
Kinatibuk-ang 250 ka mga sakop sa BFP nga mga highly trained sa search and rescue ug ang uban duna nay mga kasinatian sa search and rescue sama sa pag-igo sa supertyphoon Yolanda sa Eastern Visayas ug Sendong. SCG