NAPATAY ang usa ka sakop sa Ozamis City crime syndicate group sa dihang suway nga nisukol sa mga pulis nga mo-serve unta sa tulo ka mga warrant of arrest sa Deca Homes 4 subdivision, Barangay Bankal, Lapu-Lapu City niadtong Miyerkules sa gabii.

Ang suspek gilambigit sa illegal drug operations sa mga dakbayan sa Lapu-Lapu ug Mandaue, diin duha sa iyang mga kauban gipatay sa miaging buwan.

Ang ilang grupo gidudahang maoy nagpadagan sa illegal drugs sa ubang dapit sa Cebu, kansang supply gikan sa Mindanao.

Giila ang namatay nga si Crisolito Unito, alyas Sonny, top 6 most wanted person sa Police Regional Office (PRO)9 ug high value target sa Ozamis City Police Office.

Matod pa ni Sr. Supt. Limuel Obon, hepe sa Lapu-Lapu City Police Office, nga ang PRO 9 nakig-alayon sa ilang buhatan sa dihang natultolan ang hideout ni Unito sa Barangay Bankal.

Sumala pa sa opisyal nga niadtong Miyerkules sa alas 8:15 sa gabii, nakamatikod si Unito sa presinsiya sa mga pulis hinungdan nga daling mibunot sa armas.

Apan giunhan sa pagpusil sa mga operatiba nga gipangulohan sa PRO 9 inabagan sa Lapu-Lapu City Police Office team.

Si Unito adunay warrant of arrest sa kasong murder, robbery, ug robbery with violence against and intimidation against persons didto sa ilang lugar.Nasuta sab nga miyembro si Unito sa “Dragon” group usa ka crime syndicate sa Ozamis City nga gipangulohan sa gihinganlag Manuel Francisco, alyas Maning Lapad, kinsa nalambigit sa mga Parojinog sa Ozamis City.

Ebidensiya nga nakuha gikan sa subject mao ang .45 caliber pistol lakip na ang magazine nga adunay mga bala. FVQ & FMDD