LAAK, ComVal Province -- Wala damha sa magtiayong mag-uuma nga kamatayon ang sangkoan sa bana sa maayong pag-abi-abi sa bisita human siya gipusil.
Ang insidente nahitabo sa Purok 14, Sityo Cebuli, Barangay Kapatagan, alas 10 sa buntag, Martes, Oktubre 2, 2018.
Biktima giila nga si Nicomedes Tapilot, 43, nagpuyo sa Purok 14, Sityo Cebuli, Barangay Kapatagan, Laak.
Ang imbestigasyon sa Laak Municipal Police Station nagkanayon nga ang biktima, kauban ang iyang asawa nga si Maria Tapilot, tua sa ilang balay sa dihang miabot si alyas Brando ug lain pang duha ka wala mailhing mga lalaki.
Giabi-abi sa magtiayon ug gidalitan og kape ang mga suspek.
Apan wa magdugay ang panag-istorya sa dihang gipusil ni alyas Brando ang biktima sa makadaghang higayon kon diin naigo siya sa nawong ug nagkadaiyang bahin sa lawas nga misangko sa hinanali niining kamatayon.
Mga suspek paspas nga miikyas paingon sa wala matinong direksiyon.
Samtang ang kapulisan nakarekober og tulo ka basiyo ug duha ka balinis sa kalibre .45 nga pusil gikan sa dapit sa nahitaboan.
Patay'ng lawas sa biktima gidala sa pamilya ngadto sa Tagum City, Davao del Norte.
Wala gipadaplin sa kapulisan ang personal nga bangi isip motibo sa krimen.
Gidason sa taho sa kapulisan nga padayon pa nga giila sa Laak Municipal Police Station ang tinuod nga pangalan sa mga suspek.