GIBUTYAG ni MOISC general manager ug kanhi Cagayan de Oro City councilor Prexy Elipe nga suportado niya ang iyang kapikas nga si konsehala Nadya Emano sa unsa man nga posisyon nga daganan niini karong umaabot piliay Mayo 2019.
Matud ni Elipe sa SunStar SuperBalita nga kung adunay daganan nga dako nga posisyon si Nadya sa dakbayan sa Cagayan de Oro, gipasabot niining wala siya’y daganan sa umaabot nga piliay labina nga nagpabilin siyang rehistrado sa probinsya sa Misamis Oriental.
“Wala koy daganan ug magpokos ko sa pagtabang ug pagsuporta sa akong asawa,” matud ni Elipe.
Taliwala nga adunay mga miindorso ni Nadya sa pagka-mayor sa dakbayan sa Cagayan de Oro, giklaro ni Elipe nga andam si Nadya niini apan aminadong dili sa pinansyal nga aspeto.
Matud ni Elipe nga wala silay igong kantidad aron ikasuporta sa kandidatura kon ugaling magpapili kini.
Wala usab sila gasalig sa suporta sa ilang mga gikaalyado nga partido sama sa Hugpong ng Pagbabago. (SVB)